غزوة الصناديق

هو اولا انا اعرف ان كلمة غزوة دى تطلق على حرب للمسلمين
ويكون شارك فيها النبى صلى الله عليه وسلم
ثانيا اختيار الالفاظ مهم اوى فى الكلام
------------------------------------
طبعا انا مش عارف اقول ايه على الكلام اللى قاله الشيخ
وطبعا انا مش عارف اقف على انهى جبهة
واكيد مشكلة كبيرة لما تبقى عندك ضربات داخلية
مش عارف اتكلم
هى مشكلة الجماعة السلفية انها مش جماعة اصلا
ملهاش رئيس
ملهاش حاجة
ومع انى دى مشكلة بس بردو اقدر اقول ان ده سر نجاح الدعوة
طب ازاى مشكلة الجماعة ونجاح الدعوة
عادى
لانها مش جماعة
لانها دعوة
اذن احنا نمسك انها دعوة بقى
نركز بقى على الدعوة
طيب هى الدعوة دى حاجة بسيطة
حاجة قليلة لا دى مهنة الانبياء والرسول
ابعد على السياسة
ابعد وسبها لاهلها
ابعد عنا لاننا فى مقام دعوة وليس مقام اقامة دولة
لما نقيم فينا الاسلام سيقيم الله لنا الدولة
ولكن هذا ليس الوقت
لو سألت اغلب الناس دلوقتى هتقولك انا مش عايز حد يحكمنى بقال الله وقال الرسول
انا واحد صحبى قالى كدا
يبقى الحل ايه فى كدا
الحل اننا ندعو الناس
نعرف الناس علشان الناس هى اللى تطلب
مكملتش الموضوع علشان الشغل
كتبته يوم
24-3-2011
من اسبوع تقريبا
للحديث بقية ان شاء الله

بلدى بتعتى

طول عمرى عايش فى البلد دى وعارف انها بتعتى
وبحبها
مع انى بردو كنت عارف انها بتاعت ناس تانية
ووكلنها ولعه
بس الفرق بينى وبينهم
ان هما مبيحبوهاش
بيسرقوها بس
حتى لو ادعوا انهم بيحبوها وانهم امناء
مع الاسف اللى مزعلنى دلوقتى انى حاسس ان الناس دى لسه موجودة
بس مش فلول الحزب الوطنى والكلام الفاضى ده
لا ناس فعلا من اللى المفروض انهم بيحبوا البلد
انا مبنكرش انهم بيحبوا البلد
بس انا شايف انهم بيحبوا نفسهم اكتر
المهم دلوقتى عندهم مش ان البلد تقوم
لا المهم انهم يفضلوا كويسسين
المهم الاعلام يفضل فى ايديهم
زمان كان النظام عدو ليهم
زمان كان النظام عندهم بيظلم الشعب كله
دلوقتى هما شايفين المشكلة بقت فى الاسلاميين
والاسلاميين عندهم اى حد ينتمى الى الدين بصلة او بأخرى
ده بقى هو العدو
ده بقى المهم انه ميوصلش لاى حكم
مش عارف مين اللى قالهم ان حد الاسلاميين زى ما هما بيقولوا بيفكر يحكم
اللهم الا الاخوان
والاخوان علشان مش عايزين قلق قالوا بمنتهى الصراحة فى تصريحات كتير
احنا مش هنقدم مرشح للرئاسة ولا عايزين اكتر من 30 فى المية من المجلس
وبعدين سعات بيغضوا البصر عن الاخوان ويركزوا على الجماعات المتطرفة
وطبعا التطرف الرهيب بتاع السلفية واخبار هنا وهناك وبرنامج هنا وهناك
كلام فاضى وهبل وعبط
حسبنا الله ونعم الوكيل
طيب انا مش فاهم هو احنا اسوء من النظام القديم
هما سمعوا حد فينا بيقول امسك حكم
هما عرفين احنا مين بالظبط
طيب هو احنا جماعة
لينا مقر
لينا رئيس
مع الاسف اغلب اللى بيتكلم مش فاهم اى حاجة فى اى حاجة
هو خايف وخلاص
هو عايز يوصل للناس الخوف وخلاص
انا شايف ان ان شاء الله الحملة الاعلامية الكبيرة دى على السلفيين هتعمل نتيجة عكسية
والناس تدور وتعرف يعنى ايه سلفية
والناس تزيد فى حب السلفية
زى ما حصل مع النظام القديم لما عملت مسلسل الاخوان
الاخوان كانوا فقدوا كتير اوى من تأييد الناس فى الشارع
جه المسلسل خلى الناس ترجع تانى تحب الاخوان وتتعاطف معاهم
حتى لو بمجرد الوقوف بجوار الحق
انا شايف ان الناس دى متتعلمش
او بتتعلم بس اللى هى عايزة تتعلمه
مع انى عارف بردو انه طبيعى انه كلا يعغنى على ليلاه
مهو مش معقول حد بردو هيغنى على ليلة واحد تانى
بس الفكرة انه يبقى فيه شوية انصاف
مش معقول الظلم البين ده
حسبنا الله ونعم الوكيل
اللى هما مش قادرين يفهموا او فهمينه وخايفين منه
ان الشعب المصرى بتبعه بيحب الدين
وفى التاريخ اثبات لده كتير اوى
فى الحملة الفرنسية
فى دخول الاسكندر الاكبر مصر
وفى غيره وغيره
انا شايف ان الاعلام كدا بساعد الدعوة السلفية
ولا املك الا انى اقول للعلام
شكرا على الدعاية المجانية
ولا جزاكم الله خيرا
على عنوان كلمة للشيخ محمد اسماعيل المقدم قبل الاحداث بعنوان
ايتها الصحف السوداء والصفراء
شكرا للدعاية المجانية

يوم الاستفتاء

يوم جميل
روحت انا واتنين اصحابى
هما قالوا لا
وانا قولت نعم
وكنت حاسس بسعاده غريبة وانا رايح وانا فى اللجنة وبعد الاستفتاء
فرحان كدا مبسوط سعيد حاجات كتير كدا
الناس كمان تبوص فى عينهم تحس انهم مبسوطين
تحسن انهم فرحانين
وتحس كدا انك ماشى بتتنطط وانت رايح ووانت جاى من السعاده
انا شاركت مره وحده قبل كدا فى انتخابات 2005
وكان لسبب معين
بس طبعا مش مساعدة الاخوان علشان محدش يفهم كدا
هو كان خالى مترشح وروحت علشان انتخبه
مش عارف ليه مع انى كنت بقول لامى
دا خالى لو نجح يا ماما يبقى من علامات سوء الخاتمة له
بس الحمد لله منجحش
اهو لو ربنا يقدر الظروف وتتكرر وينجح يبقى ان شاء الله خير
لاننا ان شاء الله مش هنلاقى فى مجلس الشعب حراميه تانى
بعدها وقبلها عمرى مفكرت اروح
حتى لما كنت بفكر اروح كنت بقول على ايه يعنى كبر
دى البلد كلها فاسدة
دلوقتى البلد بجد اتغيرت الحمد لله
فعلا اتغيرت
حتى لو احنا محسناش برخاء اقتصادى دلوقتى وانا عارف انه لسه بدرى على الكلام ده
بس معنويا تحس بحاجات غريبة
معنويا تحس انك ماشى فى بلدك
تحس انك ماشى فى مكان بتحبه
تحس انك ماشى فى مكان بتاعك
غير الاول خالص
مع انى بردو زمان كنت بحب البلد دى
يعنى انا مش زى ناس كتير بتحب البلد بعد الثورة
لا انا فعلا بحبها من زمان
وانا حتى كنت بقول كدا
كنت بقول كدا وعارف ان دى من الفطرة
وكنت حتى لما اشوف الناس اللى بيظهر من كلامها انها مبتحبش البلد
كنت ببقى عارف انه كلام بس انما لو رجعته فيه هيتطلع بيحب البلد
هو بس مضايق من حاجة
انا حتى حاسس انى مبسوط انى كنت بحبها قبل ما الناس الكتير اللى بيحبوها دلوقتى يحبوها
انا كنت قبل ناس كتير
وبعدين ربنا بيقولنا ان اللى انفق قبل الفتح وقاتل مش زى اللى انفق بعد الفتح وقاتل
فعلشان كدا لازم ابقى مبسوط
بس برود علشان مننساش ان ربنا قال ان الاتنين كويسين
الاتنين انفقوا وقاتلوا
الحمد لله ان مصر رجعتلنا تانى
الحمد لله
هى كدا كدا بتعتنا
بس هى بس رجعت
الحمد لله
انا مجرد بس لما بتكلم على اليوم بتاع امبارح ده بتاع الاستفتاء بحس انى مبسوط
عارف لما تكون حاجه بتحبها وبتحب تتكلم عليها كتير هو بالظبط كدا
لما بحكى لحد لما بسئل حد عملت ايه روحت قولت ايه
الحمد لله
اه كمان اتصورت انا واصحابى جنب البوستر بتاع تعليمات الاستفتاء
وانا عامل علامة صح بصباعى اللى عليه الحبر الفسفورى
واصحابى علشان قالوا لا عملين علامة صح بردو بالحبر الفسفورى بس ايدهم لتحت
وواحنا هناك راجل عجوز وقف جنبنا يتفرج علينا واحنا بنتصور ومعاه واحد تانى
بيتفرجوا وبيضحكوا وبعدين سألنا قولتوا ايه
واحد صحبى كان بيقولى يا محمد
قاله قلنا لا
قالى محمد وقلت لا
قلته لا انا قولت نعم
هو ده اللى محمد وقال لا
وضحكنا وخلاص
طبعا هو قال كدا لاننا عرفنا ان الكنيسة قالت للمسحيين روحوا قولوا لا
وفعلا واكيد عملوا كدا
بس الغريب انى سمعت النهارده ان فى مسحيين كتير قالوا نعم
واكيد دايما هيبقى فيهم ناس بيفكروا
مش معنى كدا ان اللى قال لا مبيفكرش
انما قصدى ان مش بيسمع كلام الكنيسة على طول
وانا على فكرة كنت مقتنع بنعم قبل ما اسمع اى كلام من المشايخ
يعنى انا كنت مقتنع بنعم قبل كدا
كنت بقرء كلام اللى بيقول نعم واللى بيقول لا
وفى الاخر استقريت على نعم
فى الاخر كان يوم حلو الحمد لله
وربنا يصلح احوالنا واحوال البلد وبلاد المسلمين كلها ان شاء الله
شوف كمان لما تقرء ان فى لجان فى الجيزة وقفت شوية علشان الصناديق خلاص على الاخر
الحمد لله
المفروض نحمد ربنا ونصلى ونشكره على النعم العظيمة دى
الحمد لله
كنت لسه بقول لواحد قريبى انا بقول بردو هو احنا عملنا ايه علشان ربنا ينعم علينا بكل ده
قالى احنا غير كل الشعوب
احنا شعب طيب
الحمد لله
الجميل كمان ان انا رايح اقول نعم وحاسس ان فى نعم مصلحة البلد
واصحابى معايا الاتنين رايحين يقولوا لا وبردو من وجهة نظرهم ان دى مصلحة البلد
فالكل فى الاخر عايز مصلحة البلد

مدونة احمد عز

هو انا عايز اعمل مدونة احمد عز
عايز اعملها من فترة
بس من كتر ما الراجل ده مش كويس مش قادر احط نفسى مكانه
انا حتى لما اى حد يتكلم كلام ملوش لازمة فى العربية فى الموصلات مبتكلمش
عادى بعدى وعادى
الواحد اه بيضايق ان فى ناس دمغها لسه كدا بس تعمل ايه هى دى سنة الحياة
الا يمكن مره واحدة من يومين تقريبا
سواق العربية واللى قاعد جنبه كانوا بيتكلموا على الكمين وانه زى الته
بس كانوا مختلفين السواق بيقول انهم مبيخدوش عاطل فى باطل والراجل بيقول لا
وارح داخل اخينا ده فى الكلام وقالك واحد زى احمد عز
شركة اسمهما وقعت
وهو اشترى الاسهم بتعتها
وخدها وشغلها
شغل دماغه وجاب فلوس مسرقش يعنى
قال كدا وانا مقدرتش امسك نفسى
كنت نازل وقولتله وانا نازل
تصدق انت اول واحد اشوفه فى الشعب المصرى بيقول احمد عز مش حرامى
بسرعه الراجل اللى بينه وبين السواق قالى كنت لسه هقوله كدا
قولتله ايه يا عم لما نزلت من العربية وبقيت جنبه
انت حزب وطنى والا ايه
قالى لا يا عم ولا حزب وطنى ولا حاجة
فهل بعد الكلام ده اقدر احط نفسى مكانه مش عارف
انا لما كنت بتخيل انى بتكلم عن الضابط اللى قتل الواد بتاع اسكندرية
وعسكرى الامن المركزى
كنت بحط نفسى مكنهم بجد
انما ده احطى نفسى مكانه ازاى
دانا هعوز استحمى بميه نار لو عملت كدا
وهبقى كداب فى اى كلمة بقولها
عموما هحاول
بس فى حلقة تانية بقى علشان انسى انى بكدب

نعم

نعم للتعديلات الدستورية
ليه علشان بعد شوية هنغير الدستور كله
ليه لانى مش عايز رئيس الجمهورية تبقى مراته من دولة تانية
ليه علشان نبدء نبى بقى فى البلد مش لسه هتستنى فى فوضى 3 شهور او اكتر
لحد لما يعملوا دستور جديد
ليه علشان امريكا بتقول لا وعيزانا نفضل فى فوضى
ليه لان الحزب الوطنى قال اه وقالها نوع من انواع التضليل انا شايف كدا
ليه علشان نقفل كمان اى فرصة على الحزب الوطنى انه يجمع نفسه تانى
ليه علشان الناس اللى عايزة البلد تخرب تلاقى العكس هو اللى بيحصل
ليه علشان كدا كدا الريس الجديد هيعدل الدستور
ليه علشان دى خطوة مهمة اوى فى التغيير مكناش نحلم بيها
ليه لان كل لما الوقت يعدى البلد بتخرب
ليه لان مش مضمون لما استنى دستور جديد يطلع زى ما انا عايز
ليه لان لو مصر فضلت كدا 3 اشهر ممكن تعلن افلسها
ليه علشان الجيش يسلم السلطة بقى
ليه علشان الناس تبدء تحس معنويا ان فى حاجة بتتغير
ليه علشان خطوة البناء او عجلة البناء تبدء فى الدوران
ليه علشان لو معملناش كدا هيقولك سبونا بقى 3 اشهر على حد ادنى نعملكوا دستور جدا
ليه تانى لانه كدا كدا هيتعمل دستور جديد لما الريس الجديد يمسك
طب افرض مسك ومعملش دستور جديد
مش هيقدر لانه هيكون وعد عليه يعمل فى اول 6 شهور من مسك الحكم
مش هيقدر لانه مش هيقدر يعمل اى حركة من حركات النظام القديم
مش هيقدر لانه مش هيقدر يعمل اى حركة من حركات الدكتاتور
مش هيقدر لانه هيبقى عايز اسمه يتكتب فى التاريخ ان هو اللى نهض بمصر
مش هيقدر لاسباب كتير اوى
مش هيقدر لانه هيبقى عارف انه لو عمل حاجة غلط الشعب كله هينزله التحرير
مش هيقدر فعلا
وبعدين اللى بيقولوا ان الدستور اصلا فقد شرعيته مع الثورة
طب ما هما كانوا بيقولوا ان الثورة عايز تغير كذا وكذا فى الدستور
وبردو عايز افهم هو لو قلنا نعم دلوقتى علشان الدنيا تمشى
وبعدين كل الدستور هيتغير ايه العيب فى كدا
لا غير الدستور الاول
طب يا عم منا هغيره بس اوافق على التغييرات دى الاول كنقطة بداية
انا مقتنع بنعم
وحتى لو لا عندهم اراء مقنعة
بس نعم دلوقتى احسن علشان وضع البلد اللى بقى زى الزفت
انا مش عايز اعيش فى فوضى
انا مش عايز اعيش فى قصاص
انا مش عايز اعيش فى ماضى
انا عايز اشوف مصر جديدة
انا عايز اشوف مصر بتتغير للاحسن
انا عايز اشوف حاجة حقيقية على ارض الواقع
ارض الواقع فى التعديلات دلوقتى الريس مصرى متجوز مصرية بيس
ارض الواقع الريس له فترتين بس بيس جدا
ارض الواقع فترة الرئاسة 4 سنين يا جماله
نشتغل بقى
انا نفسى اشوف شفافية
انا نفسى كل حاجة يبقى ليها جدول زمنى
كل حاجة الشعب نفسه فيها
الحكومة تحطلها جدول زمنى والناس كلها تعرفه
يتعرض فى التليفزيون المصرى
يتكتب فى الجرائد
يتوزع فى ورق على الشعب
ريحونا بقى
دا هيريح الناس كلها
اللى بيبوس لقدام وعايز تنمية
واللى بيبوص لورا وعايز قصاص
كله هيرتاح
يا رب اصلح حال بلدنا مصر يا رب وكل بلاد المسلمين
يا رب

تخيل لو اسمك مبارك

كنت راكب عربية وبعدين اتلقيت راجل كدا بيقول لعيل صغير
ادخل انت يا مبارك جوا انت صغير
علشان يعنى المكان اللى فاضل فى العربية صغير وعلى اده
وبعدين قولت ياه كان ممكن الموقف ده يعدى عادى قبل 25 يناير
او يعنى قبل 11 فبراير
انما دلوقتى ممكن يعدى على حد اظن لا
اى حد كان هيأخد باله من اسم الواد ده
طب يا ترى الواد ده يتعامل مع اسمه ازاى
انا مش قادر اتخيل نفسى مكانه
بس لو انا مكانه
؟؟؟؟؟؟؟؟؟؟؟؟؟؟؟؟؟؟؟؟؟
فى المدرسة هيبقى موقفى محرج جدا
المدرس قوم يا مبارك
كل العيال هيضحكوا
فى الشغل اول ما يروح كل الناس لما تشوفه هتضحك
وهو رايح ووهو جاى الناس هتبقى عينها معاه
اسمه هيبقى كأنه وصمة عار مبارك
طب ابوه ليه سماه مبارك
مش عارف اختار الاسم ده ليه
اصحابه هيبعتوله رسائل تريقة على الموبيل
مش هيعرف يهرب من التريقة خالص
مش هيعرف يهرب من عيون الناس اللى عارفه اسمه
شوف مع انه مش اسمه هو شخصيا
اسم جده بس شوف عمل ايه فى جده
الحمد لله ان اسمى مش مبارك

مدونة عسكرى امن مركزى

انا من بلد صغيرة تبعة لمحافظة الدقهلية
سنى 19 سنه
اتأخرت عن الجيش شوية
بس نصحونى قريبى من البلد ومن البندر انى اروح
اروح علشان ميحصلش مشاكل لو نزلت مصر
ويا ريتنى ما روحت ولا سمعت كلامهم
روحت الجيش
ومنه على الامن المركزى فى الداخلية
مكنتش اعرف ان الجيش بيروح منه على الشرطة
كنت فاكر ان الجيش ده كله على الحدود وضد اسرئيل
من ساعة ما دخلت الامن المركزى ده وانا حياتى اتغيرت
حاجات كتير بتحصل وانا مش فاهمها
كنت مبسوط فى الاول وفاكر انها ترئية
مع انها ترئية غريبة
وكنت مبسوط لانى حسيت ان المخبرين اللى فى بلدنا مش هخاف منهم تانى
انا شغال فى الداخلية بقى
بخد مرتب
بعد كدا اكتشفت انها ممكن عقوبة مش ترئية
لانى شوفت ذل غريب هناك ومعملة غريبة
كنت بستغرب من الناس اللى فى بلدنا اللى بتشتكى من الجيش
ولما دخلت الدخلية عرفت
طلعت مش يرئية طلعت ذل
هما قالولنا اننا بنخدم الوطن
وانا كنت عارف ده عن الجيش
انما عن الشرطة لا دى بتخدم الشعب مش الوطن
رغم انى سألت واتجوبت بألم على وشى
راحت معاه كرمتى
او اللى باقى من كرمتى
كان واحد من بلد جنبى بيقولى لما يشوفنى زعلان
دول بيخلونا رجالة متزعلش
بس انا كنت بزعل مال الرجولة بقلة الادب
اللى كان بيصبرنى انى كنت بحس انى بخدم الناس
او بخدم البلد
والناس كويسه والبلد بحبها
لحد لما حصل حاجتين اغرب من بعض
مفهمتهمش الا بعدين
اول حاجة كانت حريقه واحنا نايمين
وناس اعرفهم كتير ماتوا الله يرحمهم
قالولنا اصحابكوا دول رجالة
ماتوا شهداء
لانهم بيدفعوا عن الوطن
وهنا لتانى مره اسأل وطن ليه مع انى خدت المره اللى فاتت ألم
بس مقدرتش امسك نفسى المره دى
دول كانوا نايمين
عرفت الاجابة وبينت الاجابة القديمة
اه دول كانوا نايمين علشان يقوموا يدافعوا عن البلد
واللى فات عرفته كمان
لان الدفاع عن الناس ده دفاع عن البلد
فرحت اوى بالاجابتين
لدرجة انى نسيت ان المطافى منعوها من الدخول
وفضلت يجيى شهرين ناسى الموضوع ده خالص
وفرحان علشان انا فى الجيش
اه روحت الداخلية
بس بعمل زى الجيش
وبدافع عن البلد بجد
لحد لما عدى الشهرين وافتكرت الموضوع تانى افتكرته لما كنت واقف خدمة بالليل
وحصلت حريقة فى بيت جنب الخدمة
وانا مع الناس بتابع بس مش قادر اسيب الخدمة
لحد لما صحيت على تعاسه الذكرى
صحيت على عربية المطافى جايه بسرعه
فى اللحظة دى حياتى وقفت
وبدأت وكأنى عايش من شهرين
واحصابى جوا بيولعوا
واحنا بنرمى ميه من اى حته
ومفيش مطافى
افتكرت
زعلت
بكيت
ورجعت افتكرت انى مش فاهم
مش فاهم ليه ملحقوش اصحابى
مش فاهم ليه سابوهم لحد لما اتحرقوا
مش فاهم
ولحد دلوقتى وانا مش فاهم
الحاجة التانية اللى حصلت كانت انى عرفت ان كمان كام يوم عيد الشرطة
فرحت مكنتش اعرف
وقولت هناخد اجازة اروح البلد
بس محصلش
وحصل العكس تماما بدل ما كنا بنشتغل 12 ساعة
بقينا بنشتغل طول اليوم ونام شوية فى الشارع
ساعة اتنين
ونصحى نشتغل تانى
لا والاغرب من كدا ان الناس اللى احنا بنحميها
هى اللى احنا وقفين وبنحمى البلد منها
او بمعنى تانى
شوية من الناس
فجأة اكتشفت ان الناس مش كلها بتحب البلد زيى
فجأة عرفت ان فى ناس كتير اوى مبتحبش البلد كتير كتير
ولا بتحب المسلمين وهما كمان مش مسحيين لانهم بردو مبيحبوش المسحيين
وهما بردو مش يهود لان كان فيهم ناس عارفهم ناس بشوفها فى الشارع عادى مشيين
كانوا بيقولولى وانا واقف خدمة سلام عليكم
زمان
دلوقتى بيضربونى بالطوب
علشان بدافع عن البلد
دى كانت بالنسبة لى اغرب من الحريق اللى مات فى اصحابى
انا بقولك سلام عليكم النهارده وبضربك الاسبوع اللى جاى بالطوب
دا اللى حصل فى عيد الشرطة
بعد كدا فهمت وعرفت الاجابات اللى كانت محيرانى بعد بعدها بكتير
بعد 3 اسابيع عرفت الاجابة
عرفت ان اللى كانوا بيضربونا بالطوب دول بيحبوا البلد
عرفت ان احنا مش بنحمى البلد
عرفت ان الناس اللى كنا وقفين ليهم دول محترمين وهما اللى بيقولولى سلام عليكم
هما فعلا
وعرفت كمان ان بلدنا فقير علشان العضو بتاع المجلس بتعنا غنى
وعرفت كمان ان اهل مصر دول كمان زينا شكلهم حلو بس معهمش فلوس
ويمكن احنا احسن منهم بناكل احسن منهم
وعرفت انهم طلعيين علشان كل اعضاء المجلس عندهم اغنية بردو
وعرفت ان الحكومة غنية وظالمة من اصغر راس لاكبر راس
مكنتش متخيل ان مصر فقيره
كنت بحسب بلدنا بس
والبلاد اللى زيينا
انما مصر
البندر
غريبة
اتارى كل الناس اللى فى الداخلية حارمية
اتريهم كانوا بيضحكوا علينا بانهم بيحبوا البلد
بيحبوا البلد وبيحبوا فلوسها
اتريهم سابوا اصحبنا يتحرقوا علشان السرقة اللى بيسرقوها
منهم لله
مش هنسى لما كنت مستنى العيد علشان الاجازة وطلع مش عيد ولا اجازة
مش هنسى لما نمنا على الرصيف واحنا قعدين بعد ما وقفنا 18 ساعة
مش هنسى لما صحونا بعد شوية صغيرين علشان نقف تانى
مش هنسى لما قالولنا ان احنا واقفين علشان نحمى البلد
مش هنسى لما قالولنا ان احنا بنحمى البلد من الناس اللى مبتحبش اى حد غير اليهود
مش هنسى لما قالولنا دول عملين نفسهم بيصلوا علشان يضحكوا علينا
مش هنسى لما قالولنا دول ناس من اسرئيل ضحكوا عليهم وبيخلوهم يعملوا كدا
مش هنسى لما ضربونا مع الناس اللى جاية تخرب البلد بالغاز وناس مننا ماتوا
احنا معاكوا احنا مبنخربش البلد
الحرق
والمظاهرات قصدى الثورة فهمونى حاجات كتير
عسكرى امن مركزى

وتم قمع الثورة

هو فى حاجتين
اول حاجة انه تم قمع الثورة
وفى حاجة تانية مختلفة شوية بس مش اوى ان الثورة المضادة نجحت
الاتنين دول ممكن يعملوا نتائج كتير اوى والنتائج هتبقى متشابهة
هو قمع الثورة محصلش وخلاص عدى وقته مش هيحصل
اما الثورة المضادة فوارد انها تنجح بس بنسبة ضعيفة
بس على افتراض نجاح واحدة منهما كان ايه اللى هيحصل
---------------------------------------------------------
1- احمد عز
تم تبرئته من كل التهم الموجهه ايه كما تبين للجنة تقصى الحقائق انه كان بيحط من جيبه فى جيب الوطن
وده طبعا هيحصل لكل اللى زيه مغربى وجرانه وكل الشلة الجميلة دى
2- الاخوان المسلمين
مش عارف اقول هيتعمل فيهم ايه بس عموما هتبهدلوا جامد اوى واحتمال تسمى الجماعة المقضى عليها بدل المحظورة
3- برامج التوك شو
مجدى الدقاق هيجى فى برنامج العاشرة مساء ويتكلم عن التهم الخاطئة اللى تم توجها لرجال الحزب
ممتاز القط هيجى فى برنامج 90 دقيقة ويتكلم عن مدى الشفافية اللى بيتمتع بها رجال النظام
مرتضى منصور هيجى مع عمرو اديب ويتكلم على اد ايه الريس بيقف مع الحق
احمد المسلمانى هيتكلم عن عناوين الجرايد بتاعت التلت سنين اللى جايه وممكن يجيب هيكل يتكلم شوية عن عبد الناصر
4- الجيش المصرى
هيطلع طبعا فى التليفزيون البطل اللى حافظ على امن البلاد وامن المواطنين طول فترة الثورة
5- الرئيس مبارك
هيتكلم طبعا عن المعارضين وقد ايه هو كان صدره واسع ليهم
7- عبد الرحمن يوسف
هيتنفخ
8- البردعى
مش هيجى مصر تانى
9- نواره نجم
هتكتب الواجب مع ولادها
10- ابراهيم عيسى وحمدى قنديل
هيسيبوهم علشان يبقى بردو فى صوت للمعارضة
11- السلفيين
هيطلع اختيارهم الاول فى عدم المشاركة كان صح وهيتعقبوا على تغيير الفتوى وهيطلع عنيهم
12- صفحات الثوار على الفيس بوك
هيبقى عندها حالة يئس رهيبة
13- تعليقات الناس على الموضيع على النت
هتقل جدا واكتر الاخبار هتبقى شبه بعضها والمعارضة مش هيبقى ليها صدى
14- المترو
هيبقى رايق اوى علشان هيبقى مرشق امن دولة وملتحى وحليق هيطلع عين ابوهم
15- المرور والطرق
هتبقى زحمة اوى علشان مفيش كمين هيعدى عربية الا لما يفتشها كويس اوى او بمعنى تانى يرخم عليها اوى وكل سواق مكروباص هيأخد هدية من الحكومة 30 ضربة على قفاه كل يوم
16- الشعب المصرى عموما
هيصاب بحالة رهيبة من الاحباط والناس هتبقى ماشية حاطه راسه فى الارض
17- اسر شهداء الثورة نحسبهم عند الله كذلك
هيطلع واحد غريب عجيب من كل اسرة ويقول ازاى قريبه ده كان مختل عقليا او انه كان انطوائى او انه كان عنده عقد نفسيه المهم يطلع فى الاخر مش طبيعى
18 - فواتير الكهرباء والمياه والتليفون رغم انه متخصص
كل الفواتير دى هتزيد اوى لدرجة ان الكحومة هيبقى ليها فلوس كتير اوى عند الشعب وهتقسط الفواتير نظرا لرحمة الحكومة بالمواطنيين
19- اسعار السلع الاساسية
طبعا هتزيد والحكومة هتطلع تقولك انت عايزين ثورة من غير خسائر
20 - اسعار البنزين وبالتالى المواصلات
اكيد بردو هتزيد بس  الحكومة هنا هتعمل حاجة جميلة اوى هتنزل اتوبيسات جديدة زى الحمرا بتاعت نظيف وجمال ولون الاتوبيس هيبقى اسود وهينور اخضر والتذكرة بتعته هتبقى رخيصة اوى ب 5 جنيه والناس هتستناه بالساعتين فى المحطة وفى الاخر يجى مليان من الناس الاذكية اللى استنيته قبل المحطة الرئيسية بمحطتين تلاته وهو لسه فى الاتجاه العكسى لطريقهم المراد
21 - رغيف العيش
طبعا هيبقى موجود بس عليه طوابير من مصر لاسكندرية والحكومة هتنزل الجيش يوزع العيش ويساعد فى القضاء على ازمة العيش واسعار العيش الابيض هتبقى فلكية
22- كنتاكى
هيلغى توكيله فى مصر وهيفتح مكانه محلات عزاوى وهتبقى واجبتها حلوة واسعارها معقولة ودى هتبقى هدية من عزاوى لشعب جعان
23- المدعى العام
هيرجع تانى لقضية هشام طلعت مصطفى وهشام هيأخد براءة والسكرى 3 سنين سجن
24- الواد محمود المتهم فى قضية قتل بنت ليلى عفران هيتعدم
25 - احمد نظيف وبطرس غالى والحكومة القديمة هيتم تكرمها على اساس انها اللى حطت حجر الاساس للحكومة الجديدة اللى عدت بمصر من الازمة
26 - المطربين
هيعملوا اغنية جديدة للريس اسمها اول ثورة مصرية
27 - الممثلين
اللى كان معارض منهم هتزيد نجوميته واللى كان معارض منهم هيعتذر ويقول انه مكنش فاهم زى تامر وهما اللى قالولو
28 - تامر امين وخيرى رمضان هيخدوا جائزة اوسكار احسن مذيعيين
29- حسام وابراهيم حسن هيمسكوا ادارة نادى الزمالك مدى الحياة وممكن يورثوه لاولادهم ويغيروا اسمه
30 - انا
كان ممكن اتجنن وممكن بيس عادى انا كنت متوقع كدا وهشيد بدور الحكومة واد ايه كانت زكية فى الثورة المضادة او قمع الثورة

مدونة ضابط عادى

انا الضابط اللى موت الواد بتاع اسكندرية
اللى البت منها لله صورتنى بالموبيل
دى احداث الواقعة علشان تعرفوا انى برىء
-----------------------
انا كنت واقف يوم جمعة الغضب
مكنتش متوقع اى حاجة تحصل
وده كان يوم 28 يناير
كنت متوقع ان اللى بيقولوا عليها جمعة الغضب دى هتيجى على فشوش
لان كان عندنا بيانات من القيادات العليا بتفيد بكدا
وان يوم 25 يناير عدى صعب شوية بس عادى مفيش مشاكل
اه
انما المره دى الناس اللى نزلت هتخاف تنزل تانى
وطبيعى الناس اللى منزلتش هتكسل تنزل زى ما كسلت قبل كدا
والخلاصة ان كل شىء تحت السيطرة
---------------
تقريبا كل التوقعات دى طلعت غلط
واللى حصل كان مفاجأة لينا كلنا وللقيادات كمان كلها
وحتى للناس كلها
وبدئنا نحس اننا قدام طوفان
مش طوفان من الناس
لا طوفان بمعنى طوفان
مش معقول حاجة زى ما تحس
ان انت اه معاك سلاح
حد فعلا اداك سلاح
بس دخلك فى حلبة ودخل عليك ناس كتير اوى
لدرجة ان الحلبة مش مستحملة العدد ده كله
وده فعلا اللى حاصل
لان اعداد الناس كانت اصعب من ان تحصى
وفلول الناس كان لا يرى اخره بالعين المجرده
كانت من اغرب المشاهد اللى شافتها عينى
احنا سعتها اتصدمنا بس معملناش حاجة
وكنا رجالة
وفضلنا واقفين
الناس عايزة تيجى علينا تنهش لحمنا
شايفيين ده فى عنيهم كويس اوى
بس خايفين
خايفين من اننا معانا سلاح
وميعرفوش اننا مرعوبين منهم
وميعرفوش ان السلاح ده لا حول له ولا قوة
وميعرفوش اننا ممنوع نستعمله
وحتى لو بعض القيادات قالت اه استعملوه
فالكلام ده موصلش لينا
وحتى لو وصل هنفكر الف مره قبل ما نعمل كدا
لاننا مش مجانيين
ولاننا منقدرش نضرب اى حد كدا وخلاص
وحتى لو فى اخطاء وكتير للجهاز بتاعنا
انما مش معنى كدا اننا بنقتل ابرياء على الفاضى وعلى المليان
المهم ان ده باختصار كان المشهد
مع ان ده شرح بسيط جدا ليه
لان لو المشهد اتحكى صح هيبقى صعب جدا انه يتكتب هنا
هيحتاج فعلا كتب تتكلم فيه
النقطة المهمة اللى كتبت علشانها الموضوع
لو قلت الواد
انا مهما وصفت الرعب فى اللحظة دى محدش هيصدقها
انا مضربتوش بالنار زى لما بتموت جندى اسرئيلى فى حرب
مع انى محربتش
بس ده مكنش احساسى خالص
انا الضربة كانت ضربة خوف
الدوسه على الزيناد كانت دوسه خوف
خوف شديد اتمكن منى
انى هموت هموت دلوقتى
وياريتنى حتى هموت من ضربة نار
لا انا هضرب ضرب فظيع لحد لما اموت
ومش عارف ايه ممكن يتعمل فى
خصوصا انى كنت شايف البلطجية اللى كنا بنضربهم فى القسم وبنوقفهم فى الشوراع
كنت شايفهم وسط الناس كويس
وكنت حاسس كأنهم جمعوا الناس دى كلها وجم ينتقموا مننا
وكنت حاسس بدور قيادى ليهم
مع ان حقيقى ان اغلب الناس كانت متحضرة انما كانت بغير وعى بتعمل زى البلطجية
انا عارف الاحساس ده كويس
جربته قبل كدا فى مظاهرات ايام المدارس طبعا قبل الكلية
جربته كنا بنعمل حاجات غلط مكناش بنبقى ناويين نعملها بس بتتعمل غصب عننا
فى المظاهرات من فرط الحماس
وكان ده فعلا اللى حاصل كل لما واحد بلطجى يعمل حاجة الناس تقلده وخلاص
وكان الداعى لده ايه انا مش فاهم
داحنا كنا مسلمين خالص
لحد لما شوفت بعد ايام الفيديوهات وعرفت ان فى ناس من الجهاز بتعنا
اتعملت مع المتظاهرين بوحشية عارمة
اللحظة الحرجة
فى ظل الاحاسيس الرهيبة بالخوف دى
بدأت الناس تتقدم علينا بشكل مرعب
وبسرعة مرعبة
وبدء قلبى يدق دقات غريبة لدرجة انى كنت حاسس انه هيخرج من جسمى
وحاسس ان فى دقات من دى وانا بكتب دلوقتى
بس طبعا مفيش مقارنة
عملين نكلم القيادات العليا بالاسلكى مفيس اى رد
مش سمعين منهم اى حاجة
احيانا مفيش اى اتصال
واحيانا نسمع طلقات نار لما الخط يرجع
والعساكر اللى كانت معايا كنت شايف الخوف فى عنيهم
كنت شايف فى عنيهم خوف ميقلش عن اللى انا حاسس بيه
وبيسألوا نعمل ايه يا باشا نتصرف ازاى
وانا مش عارف ارد
لسه مجلناش اوامر باى حاجة
اثبت مكانك
انت بتحمى الوطن
اجمد يا عسكرى انت وهو
اجمدوا
وانا مش قادر اجمد
وانا مرعوب اكتر منهم
لحد لما ناس قربت مننا اوى
بدءوا يضربوانا بالطوب
ناس اتجرحت عساكر كتير
فى ناس كان جرحها بينزف وهى واقفه
واللى كانت بتيجى طوبة على دماغة كان بيقع وميقمش تانى من الخوف
علشان حد يدخله جوا يوديه القسم ينقله مستشفى اى حاجة المهم يهرب
لدرجة انى تخليت ان دول كمان هيجروا ويسبوانى
وانا الناس هتقطعنى
جه فى دماغى ولادى
ابنى
بنتى
جه فى دماغى مراتى امى ابويا
هتجنن لا
فى اللحظة دى ضربت نار فى الهواء بدأت الناس ترجع
قولت كويس خت شوية قوة وشجاعة
صوتى طلع بقوة اثبت
هيمشوا
كانت الغلطة انى ضربت نار اكتر من مره
اتعكست الاية تانى
الناس بتتقدم اسرع واسرع
لا دا موت
ضربت نار كتير اوى فى الهواء
خت من كذا عسكرى رشاشات وضربت خافت الناس من صوت الرشاش وجريت كويس تمام
خلص المسلسل على كدا وناس كتير اوى دخلت فى شوارع جانبيه
وناس كتير جريت
لحد ما بدء ناس تخرج تانى من الشوارع اتارى المسلسل لسه
كل شوية افتركه خلص واخد شوية شجاعه
وارجع تانى القيه بيبدء من الاول واعنف من اللى قبله
انا مش فاهم فيه ايه
انا مش فاهم هل انا روحت بلد تانية والا ايه
طيب هوا انا لابس لبس اسرئيلى لا
مش فاهم خالص ليه كدا
فى اللحظة دى بالظبط
ضربت الواد بالنار
كان من الناس اللى عماله تخرج
كان خارج جاى
وطبعا الناس هترجع وراه وهتتشجع
ماهى عرفت اننا بنضرب فى الهواء وخلاص
مش هينفع اجرى
مش عايز اموته
ضربته ومات
وهوا ده اللى حصل
وبس
ليه سمحتوا ال بتشينوا فى فيلم مش عارف اسمه ايه
لما موت وهو مش قصده
لما اتعرض لضغوط شديدة ومقدرش يستحملها
لما راح جزيرة والا بلد مفهاش ليل ومنمش وقت طويل جدا
علشان يحقق فى الجريمة
وموت وهوا فاكر انه بيموت القاتل الحقيقى
وموت صحبه من الضغط واللخبطة
مصر فى الوقت ده كانت بردو جزيرة مفيهاش ليل
كله نهار وكله مظاهرات يوم الجمعة كان اطول يوم فى حياتى
كنت مضغوط
كنت خايف
كنت مش فاهم
ليه دايما الناس اللى بتقتل قتل خطأ بتتسامح وانا لا
الدين فيه دية لقتل الخطأ
انا عايز ادفعها من دم قلبى
انا طبعا مش مسامح نفسى
ومش عايز الناس تسامحنى
بس عايز الناس تفهمنى
ومش عايز اشتغل الشغلانة دى تانى
انا كنت فاكر انى زى ما علمونا فى الكلية بحمى الوطن
انا مكنتش فاهم حاجة
بس انا وانا بكتب كدا بردو علشان ابقى صريح
مش عارف هشتغل ايه
ومش زى الناس الاغنية اللى ميفرقش معاها
وانا مش حاجة اصلا فى الجهاز بتعنا
وخلاص مش عايز ابقى حاجة
انا عايز اموت مسلم
وعارف ان محدش هيسمحنى
ولا طبعا اهل الواد
وعموما انا اصلا مش مسامح نفسى
وبردو مش اسف
ولو حد يقدر يحط نفسه مكانى يحط ويقولى كان هيعمل ايه
وسبوكوا من فكرة الانظمام للمتظاهرين دى
بتاعت الجيش
دى لان الجيش اصلا بيحبهم
ودى بتأخد وقت فى التفكير
وانا اقدر اجزم ان الضابط بتاع الامن المركزى بتاع التحرير
اللى انضم للمتظاهرين انضم وهو مرتب من زمان
مش معقول يفكر ويعملها فى سعتها
هو كان متابع اكيد النت
هو اكيد كان عارف الشارع فيه ايه
انا مكنتش عايش فى مصر
انا كنت عايش فى بينا وفى وزارة الداخلية

سفالة العمل

عايز اتكلم عن السفالة فى العمل بس ده موضوع كبير اوى وهيأخد وقت كتير
علشان كدا انا هعمله على حلقات
الحلقة الاولى يا ترى عندك مدير ست والا راجل
الحلقة الثانية يا ترى الناس اللى بتساعدها فى الشغل بترد ليك الجميل والا بطنش
الحقلة الثالثة يا ترى كام واحد فى الشغل عمل فيك اسفين
الحلقة الرابعة الخديعة الكبرى حد كنت فكرة كويس
الحلقة الخامسة ازاى تنتقم ... اكيد تنفض
الحلقة السادسة
فى حلقات كتير اوى بس الواحد مخنوق دلوقتى ومش قادر يركز
وطبعا انا مش هكتب حاجة جوا الحلقة انا هسيب المشاهد هو اللى يكتب اللى هو عايزه لان مصر بعد 25 يناير مش زى مصر قبل 25 يناير