أى حد .... رئيس الجمهورية

بمناسبة ان المجلس العسكرى ماسك فى السلطة ومش عايز يسبها
كنت بفكر لو مسكت البلد هعمل فيها ايه
وبمناسبة كتاب موسوعة الاعدام السياسى فى مصر
كنت بقول لو مسكت البلد دى انا هظبطها
هقوم بعمل بعض الاعدامات السياسية اللى بعدها البلد هتتظبط
اولا هعدم بتوع الاعلام سواء صحافة او تليفزيون
عد بقى يا معلم
بتوع التوك شو
ورؤساء التحرير
مجدى الجلاد المصرى اليوم
خالد صلاح اليوم السابع
عادل حموده الفوجر
ممكن اللى اسيبه بس يبقى بتاع الشروق
علشان خاطر فهمى هويدى
بس على شرط يظبط باقى الجريدة
وبلاش كدب ونفاق
والناحية التانية بقى هنخلص على 
معتز الدمرداش
منى الشاذلى
وطبعا توفيق عكاشة
وعندك كمان بتاع الطبعة الاولى احمد المسلمانى
وبتاع منشيت
وطبعا بلال فضل بعد لما خرف فى الدين
وفى طبعا اسامى تانية كتير
اروح بقى على رجال الاعمال النصابين والحكومة القديمة
طبعا كل اللى سرق من البلد ايده بخ
وهما طبعا كتير
بردو على سبيل المثال لا الحصر
أحمد عز
أحمد نظيف
حسنى مبارك
علاء مبارك
جمال مبارك
سوزان مبارك
ابراهيم سليمان
المشير طنطاوى
بس ده ممكن اخليه مع بتوع المجلس الاعلى للقوات المسلحة
لان هيبقى ليهم حساب خاص اكيد
أبو العنيين
محمد فريد خميس
طبعا حبيب العدلى
بس ده بردو هيبقى ليه حساب خاص
هو بس أنا بفكر فى اللى سرق
أولا نقطع ايده
ثانيا نحبسه ونكتبله على الزنزانة من جوا ادفع تخرج
زى ما حصل فى باكستان تقريبا
ولما نخلص من السرق نشوف بقى
قتل يقتل
أفسد سياسيا يحاكم على ذلك وهكذا
بس الناس بتوع السرقة دول لازم نخدهم بالتدريج
اه نسيت مع الاعلامييين طبعا عمرو أديب
وبتاعت بنات الليل سرحان دى
وناس تانية كتير
المهم ان فكرة الاعدام السياسى دى بجد هنظف البلد أوى
هتخليها تبرق
هو انا الفكرة دى بصراحة فى دماغى من زمان
بس اللى كبرها فى دماغى اوى وفكرنى بيها وقولت اكتبها
كتاب موسوعة تاريخ الاعدام السياسى فى مصر
قيل فيه ان بيبرس لما مسك مصر
اعدم كل تجار الحشيش
وقيل ايضا انه اعدم كل تجار الخمور
لدرجة انه كمان قتل احد شاربى الخمر وعلقه على باب زويله
وعلى رقبته زجاجة خمر
فهى بجد فكرة جمده علشان تنظف البلد
كمان لما نخلص على الناس اللى شكلها نظيف وهما حراميين وخربين البلد
نروح بقى على اللى شكلهم غلط
زى البلطجية مثلا
بس دول قبل ما نخلص عليهم نحاول نصلح حال اللى ممكن ينفع منهم
بس بشرط ميكونش قتل أو كان من رجال الحكومة القديمة
لان طبعا مش كلهم مش كويسين اكيد فيهم ناس كويسة
وكمان بردو ننقل من بيبرس
نخلص على بتوع البنجو الاول
وبعدين الحشيش
وبعدين الخمر
نروح بقى على بتوع الفن والكورة
اولا طبعا فى بتوع الكورة بتوع مودرن سبورت
وشوبير ومصطفى عبده والناس الحلوة دى
ريحونا بقى خنقتونا
بس الناس دى بردو هنعملهم زى البلطجية اللى هيحترم نفسه وهيبقى كويس هنسيبه
اللى هيهزر ويستهبل هنلبه
وانا بنظف البلد بقى عايز اى كلب يفكر يعملى لجوء سياسى فى سفارة امريكا والا حاجة
والسفارة تجنن وتوافق
هكون ضربه هو والسفارة
بعد لما اديهم طبعا انزار
علشان ميبقاش قتل كدا على الفاضى والمليان
اه ونسيت اقول انى طبعا هفنجر سفارة اسرائيل واحتمال كبير قبلها امريكا
بس بعد لما اقولهم روحوا بلادكم أحسن علشان ميبقاش حرام
وهظبط الليالى
اه ونسيت اقول
مصطفى بكرى ورجب حميده طبعا هعقلهم على باب زويله
وطبعا هلغى موضوع شيخ مشايخ الطرق الصوفية والكلام الفاضى ده
واللى هيحترم نفسه منهم هيقعد
هيقل هنقل
أعلانات فى الشوارع
فى الميادين
فى مترو الانفاق
فى كل مكان
الدائرى المحور
شبرا
كل حته
سيتم اعدام اى شخص يحاول سرقة هذا البلد
سيتم اعدام اى شخص يحول دون اصلاح هذا البلد
سيتم اعدام اى شخص يعسر عجلة تقدم هذا البلد
حتة فى التعليم
هحط نص فى كتاب الادب العربى فى المرحلة الثانوية
لا تصالح
أمل دنقل
فى أفكار كتير فى دماغى تخلى البلد دى كويسة
يا رب تبقى كويسة

أحسن حاجة عملتها الثورة صفر

أحسن حاجة عملتها الثورة صفر
الحاجة اللى كنت فاتح علشنها الموضوع أصلا ده
أنى كنت عايز أقول أن من أحسن الحاجات اللى الثورة علمتها
أنها خلصتنا من واحد يخنق
مصطفى بكرى
اللى كان عامل فيها بطل قومى
ومع الاسف ناس كتير كانت مصدقاه
لدرجة انى فى ناس أصحابى كانوا فكرينه فعلا كويس
حاجة تعل
ويطلع زعق ويجعجع
ويطلع فى البرنامج ده وده وده
وحاجة تخنق
وطبعا لو اتكلمت عنه مهما اتكلمت مش هعرف اقول اد ايه خنيق
أنا كان عندى الناس اللى زى
ممتاز القط
ومجدى الدقاق
أحسن منه
لان دول نفقهم واضح
وقضيتهم واضحة
هما مع النظام قلبا وقالبا
انما ده عملى فيها بطل قومى وهو بخ
وطبعا فى ناس كتير زيه كدا
يعنى مثلا
لا حصرا
ناسى اسمه
بدقن هو كدا
وكان بردو عامل فيها بطل قومى
افتكرت من سمير
رجب حميده
شوف الشهرة ملحقتش اوصفه لسمير
يدوبك قولتله كان بدقن وعامل فيها بطل قومى فى مجلش الشعب
وطلع متهم فى موقعة الجمل
قالى على طول
رجب حميده
وبردو كان يخنق
وطلع فى الاخر
متهم فى قضية موقعة الجمل
الحمد لله الثورة خلصتنا من الاشكال دى
والاشكال دى
عقبال الباقى يا رب

طبعا الباقى قصدى اللى لسه بيطلعوا فى البرامج وعملين فيها أبطال الثورة
وهما أصلا من الفلول
وهما مع الاسف كتير
بس ان شاء الله هيقعوا زى اللى قبلهم
وهتبقى فضيحتهم بجلاجل

الله يمهل الظالم حتى إذا أخذه لم يفلته
ان الله يمهل الظالم حتى اذ اخذه اخذه اخذ عزيز مقتدر

 

أحسن حاجة عملتها الثورة 1

طبعا الثورة عملت حاجات كتير حلوة
بس فى حاجات أنا نفسى مبسوط منها أوى
زى ايه
زى مثلا محور 26 يوليو
كان على طول واقف بسبب نظيف
دلوقتى الحمد لله بقى تمام
اه سعات بيقف بس بيبقى ظرف مش كل يوم زى قبل الثورة
كان نظيف باشا بيوقف الدنيا من عند بيته لحد مجلس الوزراء
عد بقى يا معلم
من أول الصحرواى حيث فيلا او قصر الباشا
مرورا طبعا بطريق القادم من أكتوبر أيضا لانه طريق واحد
الى محور 26 يوليو
وطبعا قفل المحور ده بيقفل الدائرى من عنده قفله منيلة بنيلة
لحد ميدان لبنان اللى استحالة تعرف تروحه والباشا رايح يسرق
وانت ماشى بقى
ميدان لبنان
ميدان سفنكس
تقريبا كوبرى اكتوبر
لحد لما يروح المحافظة التانية
لانه بيعدى على تلات محافظات
اكتوبر
الجيرة
ومجلس الوزراء طبعا فى القاهرة
الناحية التانية بقى
المنيل
اكيد بيأثر على طريق الكورنيش
لحد لما يخرم معرفش من انهى داهية لشارع القصر العينى
اللى هو اصلا منيل بنيله
الى مجلس الوزراء
ده على حد علمى
ممكن اكون غلطان او فى بعض الحاجات مش عارفها
انما اللى متأكد منه من طريقى
من بيتى للشغل
او بالظبط من قبل المحور بكتير لحد ميدان لبنان
واقف بقى ذل على الدائرى والطريق واقف
او مثلا وصلت والمعلم لسه معداش بس بيفضوا الطريق
واهو زى اى حد واقف اتفرج على الموكب الجامد وهو معدى
بس الحمد لله كنت بحاول مبقاش سلبى
كنت وانا واقف بقضيها مثلا شوية كدا استغفار
وبعدين بقى دعاء على نظيف وحكومته والريس
وكل اللى سبب فى اللى احنا فيه ده
وطبعا اكيد كان فى ناس كتير بتعمل زيى
دا طبعا غير الناس اللى كانت بتقعد تدعى بصوت عالى
كدا يعنى مسموع مش عالى اوى
وطبعا الكملة القوية جدا
حسبنا الله ونعم الوكيل
او
حسبى الله ونعم الوكيل
دول بقى تسمع ناس كتير بتقولهم
وانا من وجهة نظرى ان الدعاء ده
دعاء المظلوم ده
من أكبر أسباب قيام الثورة
وكيف لا
والله قد وعد المظلوم بالنصر ولو بعد حين

نسيت أقول احساس الخنقة اللى بتبقى حاسس بيه وأنت واقف
حاجة فظيعة
لدرجة أنى كان سعات بيجى فى دماغى حاجة كدا
أنى أعمل نفسى بضرب نار على الموكب
وبقول فى ثانية واحدة هكون مضروب مئات الرصاصات
وكنت بقول والناس تفوق بقى
بس مش متخيل طبعا الثورة علشان مبقاش كداب
بس كنت بتخيل أنى أعمل حاجة زى سبب أو عامل للتغيير
بس طبعا الحمد لله أنى عارف دينى
لان ده طبعا غير جائز
أنك تموت نفسك لاى سبب طبعا غير جائز

الهنود الحمر

الهنود الحمر
اللى هما فى التاريخ سكان أمريكا الاصليين
اللى تم ابادتهم بالكامل
اللى هما فى نظرى أكبر دليل على انعدام اخلاق الاوروبيين
فضلا عن انعدام الدين
وسبحان الله التاريخ يشهد بعمليات الابادة دى
ومع ذلك بيقولوا على المسلمين انهم بتوع سفك الدم
طب ازاى
مع ان التاريخ لم يذكر ذرة من مثل هذا الفعل منتسب للمسلمين
أنا شايف أنهم لازم يبقى الامريكان اللى هما أوروبيون أصلا
والاوروبين
لازم يكونوا عارفين ان موضوع الهنود الحمر ده وصمة عار
وصمة عار وشهادة تاريخية عليهم
وعلى عدم ادميتهم
التى يدعوها

صوفية آخر حاجة

تخيل لو كتاب الطبقات بتاع الصوفية اتعمله
update
لسنة
2011
هيكون شكله ايه
خصوصا ان فى منهم كتير الايام دى بيكلمونا عن انهم بيعدوا
اللى يقولك انا مش هنا انت مش عارف انا فين
واللى يقولك لازم حد من ال البيت يجيله كل شوية
واللى يقولك كان عنده مرض وحش وصعب وحد من ال البيت عالجه
وكلام غريب كدا كتير
طب دول لو عملوا كتب زى الطبقات ممكن يقولوا ايه
خصوصا بتوع الخطوة الكموديين جدا دول
يقولك مثلا
انا كنت ماشى على المحور وقبل المحور كدا بشوية الطريق وقف
من قبل البراجيل
وفجأة العربية قامت طيرة واتلقيت نفسى فى ميدان لبنان
لا مش كدا دا هيكون واحد بيحكى عن شيخه
يقولك والشيخ كان متأخر على الشغل وقامت عربية الشيخ طيرة واتلقى نفسه فى ميدان لبنان
وهو بيبصم اتلقى الساعة لسه تسعة ونصف
مع انه صاحى عشرة الا ربع
واحد تانى
الشيخ كان ماشى على طريق شرم والطريق كله ظلمة
وكانت فى حاجة ماشية فوق العربية بتعته معاه منورة الطريق علشان يشوف
لدرجة انه كان شايف الاجانب على البحر بالليل وهو فى العربية
--
مش عارف اصلا هو الشيخ ايه اللى موديه شرم
وبيبوص على الاجانب ليه ما علينا
--
وبعدين فجأة اتلقى العربية بتشطب بنزين
وقبل ما تقف العربية بثوانى اتلقى حاجة بتزق العربية
لدرجة انه شال رجله من على دواسه البنزين
لحد لما وصل لاقرب بنزينه
--
لانه بيأخد بالاسباب ههههههههههه
--
ومره تانية حصل معاه نفس الموقف
وحد مونله العربية ومؤشر البنزين ارتفع للآخر مره وحدة
رغم انه كان فى أزمة بنزين 80 فى البلد
--
أصل الشيخ بتاعه صوفى بقى وراكب عربية قديمة
--
العربية دى رغم انه كان ممكن يجيله بى ام الفئة السبعة لو عايز
بس دى كانت ايه احسن من اى عربية
--
ومرة تانية أيام الثورة بتاعت 25 يناير
والأمن كان سعتها لسه مش تمام
بلطجية وقفوه وهددوه ونزلوه من العربية
وخدوا منه العربية
وخلوه يمضى على عقد بيع
وهو نفذ كل الل هما عايزنه بمنتهى السهولة كدا
استنى بس اسمع الباقى
ومشيوا شوية وهو شايفهم وسامع صوت ضحكهم
وقبل ما يغيبه عن عنيه
يعنى مثلا قبل ما يعدوا 200 كيلو
وهو لسه بيذكر فى هدوء
شافهم وهما رجعيين بسرعة
وخايفيين
وبيدوله العربية وبيقول سامحنا احنا مكناش نعرف
وواحد منهم بقى من أقرب الناس ليه بعد كدا
--
شبيح بقى وكدا

كوباية شاى

تخيل لو كوباية الشاى دى هى النار
حاجة صغيرة أوى اللى هو انت وقعت فيها
الكوباية كبيرة أوى على حاجة صغيرة أوى
الكوباية ساخنة جدا على حاجة صغيرة جدا
أخر الكوباية هو الجزء الاكثر سخونة
أخر الكوباية أرضية مولعة نار
كمان الشاى فى الاخر كالحمم البوركانية شكله يخوف
تخيل او النار كدا يبقى بخ صعبة جدا
تخيل بقى انها افظع من كدا كمان بكتير أوى
لدرجة انها لما تيجى يوم القيامة يجرها عدد هائل جدا من الملائكة
ويراها أفضل الناس الرسل
هيقال لهم ماذا أجبتم
هيقولوا لا علم لنا
يوم يجمع الله الرسل فيقول ماذا أجبتم قالوا لا علم لنا إنك أنت علام الغيوب

الاجابات الصريحة لمستر خالد وريث الفتيحة

(وريث الفتيحة وريث اصحاب الفتوحات)

حاجة رخمة اوى لما تبقى حاسس على طول انك متهم

متهم يعنى مظلوم ليه لانك مظلوم بالاتهام

بيئة العمل دى من الحتت اللى مش اى حد يلعب فيها

لو انت شاطر هتوصل

ولو انت بتعرف تتعامل هتوصل

ولو انت بتعمل اللى عليك هتوصل

هتوصل او يعنى هتبقى كويس

وعندك اعداء كتير

ناس كتير كان فى خلل فى تربيتهم

الله اعلم كانوا اهلهم بيربوهم ازاى

انت بقى المفروض تعدى من كل الاسهم والسيوف والطلقات النارية

وكمان تعدى وتأخد بالك ان كتير من ده هيكون فى ظهرك

مش عارف اقول ايه حاجة تحزن

لما يبقى حال المسلمين كدا تبقى حاجة تحزن

ربنا يعفوا عنا وينجينا

حلف اليمين

من الحاجات اللى بضايقنى أوى موضوع حلف اليمين ده
يقولك مش عارف مين حلف اليمين النهارده أمام المشير
هو مين المشير ده
وزمان مش عارف الوزراء هيحلفوا اليمين
ومش عارف مين تانى حلف اليمين امام الرئيس
ومش عارف مين يؤدى اليمين
يا سلام على يؤدى اليمين دى
أحسن واحد شوفته بيؤدى اليمين
كان أحمد زكى فى فيلم معالى الوزير
حلف فوق ادام الريس وبعدين وهو نازل حلف اليمين الحقيقى اللى فى دماغه
انه هيستغل منصبه فى انه يجمع الفلوس اللى يقدر على جمعها خلال فترة تواجده فى الوزارة
بجد ده كان من أحلى المشاهد فى الفيلم
ومن الحاجات الحقيقية اللى أحنا كل شوية نشوفها
طب سؤال بقى وعايز حد يجوبنى عليه
هو ليه بيحلف
؟؟؟؟؟؟؟؟؟؟؟؟
يعنى لسه عندنا فى مصر أى مسئول بيحلف
؟؟؟؟؟؟؟؟؟؟؟؟؟؟؟؟؟؟؟؟
بجد مش عارف
هو المفروض موظف والموظف لو معملش شغله كويس يغور فى داهية تخده وخلاص أحلفه ليه بقى
بفكره يعنى بربنا ... لو هو فاسد مش هتفرق معاه اصلا
والا بقوله خد بالك انت فاسد وانا عارف انك فاسد وجايبك علشان انت فاسد وانا اصلا فاسد علشان جبتك
بس انا اهو بشهد عليك ربنا علشان محدش يبقى ليه حاجة عندى
كوميدى جدا بجد موضوع حلف اليمين ده

تراب الماس

كانت تبقى جملية اوى رواية تراب الماس لو كنت قرأتها قبل الثورة
هى بردو حلوة بعد الثورة بس علشان حاجات كتير اتغيرت فموش حسسها اوى
يعنى كنت بقول مثلا لو كنت قرأتها قبل الثورة كات هبقى بخاف وبعمل حساب للشرطة
انما بع الثورة بخ ولا ليهم لزمة الحمد لله
هما كانوا فعلا مفتريين زى ما جه فى الرواية
والحمد لله اننا خلصنا منهم
ويارب احوال البلد تهدأ وتستقر

لو عاوز اتكلم شوية عن الرواية هقول

أن أول حاجة ضيقتنى أوى فى الرواية المشهد اللى كان طه بيحكى فيه اليوم اللى أمه مشيت وسابت البيت
المشهد ده كان درامى أوى وكنت عايش معاه اوى وهو بيحكى لحد لما قال
انه كان عنده سبعة عشر سنه
وقع خالص المشهد منى
وقع على الاخر
لدرجة انه خرجنى من الاطار الدرامى اللى فى المشهد وخلينى اقول اوبا على الغلطة
لدرجة انى رجعت اقرء تانى قولت يمكن شوفت السن غلط
المشهد كان جميل وبيبين اد ايه طه مضايق من امه لانها سبته وسابت البيت
وقد ايه هو كان محتاج لها
وهى مسحت على رأسه وطبعت بوسه على رأسه تقريبا او خده
فطبيعى ان لما المشهد يتوصف كدا يبقى هى بتوطى وبتبوس الطفل
انما مش معقول يكون المشهد ده على واحد هلف عنده سبعة عشر سنه
مش منطقى خالص
ولو كان مثلا طفل وكان قال الكاتب كنت وقت أذ فى السابعة
كان المشهد هيكمل والواحد هيتأثر أوى لان اد ايه الام دى قاسية
واد ايه الولد ده مسكين
انما كبير اوى سبعة عشر سنه دى
الله يرحم زمان قوة المسلمين كان ممكن يقود جيوش قبل خمسة عشر سنه
بس هو عموما بردو خلينى نقول انى فى ناس موضوع السن ده مش هتتأثر بيه أوى
او ممكن حتى ناس تقرء ومتخدش بلها لان الغالب دلوقتى على الشباب والمجتمع فكرة السيس
واد ايه الناس السيس كتير وممكن تلاقى واحد هلف ولسه عيل صغير ومش عارف اى حاجة

ده لو هتكلم عن اللى ضايقنى وواقع من الكاتب

انما لو اتكلمت على اللى ضايقنى من ناحية الدين
فده بقى هيبقى طبعا كتير فى أى رواية

يعنى الروية فيها سب دين" استغفر الله العظيم "
فيها ألفاظ زى الزفت
فيها طبعا قلة أدب
الغريب أن الرواية أدب فمش فاهم أزاى كل رواية لازم يبقى فيها قلة أدب
أنا تقريبا مسمعتش عن رواية مفيهاش أى حاجة وحشة ألا رواية لكاتب سعودى
سمعت عنا بس

من الجميل بقى اللى عجبنى فى الرواية
أن أسلوب الكاتب حلو وشيق نسيت أقول اسمه أحمد مراد
ورغم أنه سنه صغير ألا ان واضح ان عنده معلومات كتير فى حاجات كتير
ورغم انها تانى رواية ليه الا انها حلوة

لو هعلق بقى على شخصيات الرواية
فطبعا أول واحد يستحق التعليق حسين الزهار أبو طه
فكرته هى محور الرواية
"حين يصبح القتل أثرا جانبيا" جميلة
 ( بين قوسين لبلد تحتضر )
هو كان عنده أداة مكنته من الانتقام للبلد من بعض مخربيها
وكلمة أم طه لما جتله بعد لما ابوه اتقتل
"أبوك كان فاكر نفسه اله "جميلة بردو
وفكرة الحلم جميلة "انا حلمت ليك حلم .....
لما قالها طه لوليد سلطان فى أخر الرواية كانت جميلة نفس نهج أبوه
زى لما قالها أبوه قبل كدا ل محروس برجاس

طه بقى انا مش فاهمه
مش فاهم هو طيب هو دكتور محترم هو مظلوم هو قاتل
هو كله دول
اما بقى وليد سلطان رئيس مباحث قسم الدقى
فده طبعا اسوء شخصية فى القصة
بس سبحان الله ربنا كان مسلط عليه مراته كانت حتى ارفانه منه وهو بيموت
وطبعا كانت ارفاه فى عيشته
اما بتاعت الجمعية الخيرية واعمال الدعارة فدى يعنى من الناس اللى أقل من أن الواحد يكتب عنها حاجة
نسيت أقول ان احمد مراد طبعا اللغة العربية عنده حلوة وده طبعا طبيعى فى أى كاتب كويس
ام طه بقى انا مش مصدقها هى كانت بتقول انها معندهاش غير خيارين اما انها تشيل الليلة
او تشيل ابوه ويبقى عار على طه
انا مش ام مش عارف هل ممكن الام تعمل كدا
هى اكيد اى ام تعمل اكتر من كدا بكتير بس لو كانت ام
ساره بقى واصحبها وفكرهم ده الغريب اللى كل حد عايز يوصله لينا
مش عارف ليه دايما بيوصفوا ان اللى بيحبوا البلد هما المتحررين او الليبرليين او العلمانييين
مش عارف ليه دايما احد حد بيغلط فى الدين بيبقى هو اللى مصلحته مصلحة البلد
مش عارف ليه الوصف ده مستشرى عند أكثر الكتاب
بنات واولاد بيشربوا حشيش وبيره وقاعدين مع بعض فى اى مكان وبعدين دول اللى بينزلوا المظاهرات
انا شايف ان لو الكاتب شايف كدا وبيحاول يوصل المعلومة دى يبقى هو اكيد كدا
بس عجنبى لما قال على لسان ساره ان هو ده الاحتفال بالمعتقلين والتضامن معاهم وعبر انها كانت مضيقة
وبردو الرد عجبنى اصل الجماعة تقلوا فى الشرب شوية
شخصيات ومشاهد الرواية تستحق الواحد يتكلم عنها اكترمن كدا بس كفاية كدا
حاجة بس كمان
"غلطة صغيرة بنصلح بيها غلطات كبيرة " جميلة اوى
حسين الزهار فى تدوينه
وطه لما كتبها فى ايد السرفيس
دى بردو جميلة اوى
نسيت السرفيس رغم انه مهم
دى ناس بنتمنى من الله عز وجل انها تختفى بعد الثورة

متورط فى قضايا فساد

دى اكتر جملة ممكن تسمعها دلوقتى
هى و
متهم فى قضايا فساد
مش عارف بجد الناس اللى كانت بتحكمنا دى ايه
ناس فظيعة
ناس غريبة
سعات بقول زى الناس
هى الناس دى بيناموا ازاى
وسعات اقول
دول يناموا ويشخروا
ليه لان الجسم بيتقل من الذنوب والمعاصى وبيحتاج لنوم كتير
مش عارف بجد ايه الناس دى
مش عارف ايه نوعية البشر دى
مش عارف حتى اتخيل نفسى مكان حد منهم
حتى لما بحاول اعمل كدا مبعرفش
ولو عرفت ببقى حاسس انى بضحك على نفسى
او ببقى بحاول اطلع نفسى برىء من التهم المنسوبه لى
بس الواقع بتاع الناس دى بجد مش كدا
بس مش معنى كدا انى عارفه
الواقع بتعهم محدش يعرف غير ربنا
سبحانه هو اللى مطلع على قلوب وعقول البشر
غيب
لا يعلمه الا الله
واخيرا الحمد لله الذى اهلك الظالمين

الغاء التوقيت الصيفى

انا مش مصدق نفسى
اخير مفيش لعب فى الساعة
اخير وخلاص لحد لما الواحد يموت مش هيفضل كل سنة يغير الساعة مرتين
الحمد لله
بجد انا يمكن سعيد بالخبر ده اكتر من خبر تنحى الريس
تخيل بقى مدى السعادة
موضوع اصلا التوقيت الصيفى ده من اغبى الحاجات اللى الحكومة الفاسدة كانت بتعملها
ومش عارف ليه
مع انى اعرف ان فى ناس كتير تقدمت بطلبات احاطة فى مجلس الشعب لالغاءه
بس ليه هما كانوا مصممين عليه الله اعلم
بس ده كان العادى من الحكومة الفاسدة
انها تسيب اى حاجة بضر المصريين
وهنلغيه ليه مش الناس مضيقة منه خلاص خليه
مش هو ملخبط الناس ومخليها مش مركزه خليه
اى هبل واى عبط خليه
حاجة تفقع
الموضوع ده اصلا كان تاريخه ايام قيام الثورة الصناعية فى اوروبا
قالوا سعتها نعمل الموضوع ده علشان نوفر فى عدد سعات النهار
بحيث انهم يستفيدوا بساعة زيادة من النهار
علشان يوفروا فيها الطاقة الكهربائية
وبالتجربة ثبت فشل الموضوع ده
فبسرعة لغوه
احنا بقى ايه قولنا نقلدهم
وفعلا قلدناهم وخدنا منهم الفكرة الفشلة
وسبنلهم الصناعة
مش بقولك حاجة تفقع
والى جانب فشل الفكرة فى كمان اطباء كتير
قالوا ان موضوع تغيير الساعة دى غبى
وبيضر الناس اكتر ما يفدهم
ليه
لان انت كدا بتلعب فى الساعة البيولوجية بتاعت الانسان
فده بيكون ليه نتيجة مش كويسه على تركيزه
وانت حتى بالتجربة لو حد يفتكر معايا
ان وقت تغيير الساعة بتبقى متلخبط كدا
وجه مثلا وقت النوم وانت تقول لنفسك انا مش بنام دلوقتى
دا دى الساعة الجديدة
لما يجى الميعاد على الساعة القديمة
وتسهر شوية بيس
وتيجى الصبح تصحى على الساعة الجديدة
تقول اه انا عايز انام تانى
لسه مش مركز
مش فايق
وخد بقى كام يوم كدا متلخبط
واهو هبل وخلاص ولا عندنا صناعة ولا زفت ولا بنوفر ساعة من كهرباء ولا نيلة
واخير الحمد لله وبعد سقوط الحكومة الفاسدة بقيادة السيد الرئيس المخلوع
نجد هذا الخبر الجميل
اللهم لك الحمد كما ينبغى لجلال وجهك وعظيم سلطانك
يا رب اصلح حال هذه البلد يا رب
يا رب اصلح حال بلدنا مصر وسائر بلاد المسلمين يا رب
اللهم لك الحمد
حمد كثيرا طيبا مباركا
ملء السموات وملء الارض
وملء ما شئت من شىء بعد

اللى شارك فى الثورة

انا عايز افهم حاجة هو اللى قام بالثورة كان بيعمل حاجة لنفسه
اللى شارك فيها كان بيعمل كدا علشان هو بس يستفيد
اكيد لو سألت اى واحد من الناس اللى راحو التحرير
انت روحت ليه هيقولك علشان مصر
طب ايه بقى اللى بيحصل ده
اللى دلوقتى تحس ان اللى كان رايح كان رايح علشان فكره هو
كان رايح علشان نفسه
كان رايح علشان يعمل بلد على مزاجه هو وبس
الموضوع مش كدا
انت عملت حاجة علشان البلد
خلاص بقى
دورك انتهى
لما نعوزك تانى هنندهلك
وبعدين متزعلش انت كنت بتعمل حاجة علشان البلد
خلاص بقى متزعلش على انك مخدتش حاجة
ابعد انت بقى
سيب ناس تانية هتبقى افيد منك للبلد فى الوقت ده
انت كان ممكن دورك مفيد زمان
دلوقتى وانت بتعارض ومش عاجبك حاجة ومش عاجبك حد
دلوقتى انت مضر
مفيش اخلاص نية
لو انت كانت نيتك خالصة من الاول ومش مستنى حاجة
وكنت فعلا بتعمل ده علشان البلد
كنت مشيت انت من نفسك
كنت بقيت بعيد من نفسك
انما دلوقتى انت عايز ايه عايز حاجة ليك
ملهاش معنى تانى
والطمع وحش وان شاء الله كله مع الوقت بيبان على حقيقته
طبعا انا بكلم ناس هى عرفه نفسها كويس
وانا عارف منها ناس كتير
وناس تانية معرفهاش
بس فكرهم معروف للناس كلها
النخبة المستنيرة
النخبة المثقفة
منكوا لله
حسبنا الله ونعم الوكيل

من عائلة حبيب العدلى

تخيل لو انت من عائلة حبيب العدلى
او اى حد من شلة الفساد بتاعت الحكومة القديمة
مش قادر اقو من عائلة صفوت الشريف
يا نهار ابيض
خلينى فى حبيب العدلى احسن
كنت زمان ماشى رافع راسك فوق اوى
من اعلى روس فى الشعب المصرى
وحاسس انك من الصفوة
وانك مهم
والناس كلها حشرات
ومحدش يقدر يعملك حاجة
لو حد ضايقك
اقل مكلمة موبيل ببلاش ما انت اكيد مبتدفعش فواتير موبيل ولا بتشحن كروت
هى شريكات المحمول تقدر تطلب منك فلوس
لو حد ضايقك اقل مكالمة توديه ورا الشمس
تخليه على رأى بتوع الدخلية ميشوفش الاسفلت تانى
مش عارف ايه الجميل اللى فى الاسلفت فبيضربوا بيه المثل
بتروح النادى الناس كلها بتقولك يا بيه ويا باشا
بتروح الشغل او المدرسة او الجامعة
او اى مكان ممكن تروحه
الناس كلها بتعملك الف حساب
واخر احترام
وبرستيج
وكلام جامد اوى
ونفاق على ودنه
لحد ما يا عين امك وقعت على ام رأسك فى المظاهرات
فضلت واقف بتابع الاخبار
ومش مصدق نفسك
دا بجد ده والا ايه
وكنت بتضحك على نفسك وبتقول اهى هتعدى
هتعدى عادى وهرجع زى ما كنت
بل اقوى كمان
بس بتقول كدا وانت مرعوب من جوه
يا نهار ابيض لو المظاهرات دى نجحت
هروح فين وهاجى منين
الناس اللى ظلمتها لو شافونى
الناس اللى بتعملى الف حساب هتدينى بالجزمة
ايه ده
انا روحت بلد تانية والا ايه
البلد دى كانت بلدنا
العيال اللى مش لقى تأكل دى هتخدها مننا والا ايه
لا يا عم بكره هيتحطو فى المعتقل وبيس البلد ترجع زى ما كانت
صحيت من النوم على تنحى الريس
صحيت من الموت على قريبك حبيب العدلى فى السجن
لسه كل ده مش عايز تخرج من البيت
مبتتعملش مع حد الا البواب والخدام وطبعا بيحترموك غصب عنهم
مرعوب تنزل من البيت
خايف اقابل اى حد فى الشغل فى الشارع
شهر كامل فى البيت
مفيش حل غير النزول
نزلت
ركبت العربية
على فين يا بيه
النادى
ياه كلمة بيه سمعتها اهو
العربية عديت عادى من البوابة
عرفنها
طب الحمد لله
نزلت عادى
الدنيا عادى
لابس النظارة
شايف عيون الناس كلها على
كله مركز اوى معايا
لما بس ببوس ناحية حد بيبعد وشه
قعدت طلبت حاجة اشربها
الناس سامع صوتها بتتكلم على اللى حصل
سامع اسمى
سامع اسم حبيب العدلى كتير
فى ناس بتضحك
وبتتريق
انا مش قادر اقعد
مش هينفع اقعد كدا
انا حاسس انى تليفزيون والناس كلها بتتفرج على احسن حل امشى
ومجيش النادى تانى
وانا ماشى الاصوات عليت
شوية
اكتر
فى ناس بترمى كلام
يا حرامى
يا ظلمة
يا حرامية
يا اللى نهبتو البلد
الكلام بيزيد وانا عامل نفسى مش واخد بالى
وصلت العربية وانا فى كل خطوة حاسس ان الناس هتقوم تضربنى
روحت
مش هروح النادى تانى الحمد لله انى طلعت
سليم
الشغل كان بعدها باسبوع جربت اروح
بس كان الوضع اسوء
وكفاية كلمة اسوء
انا محبوس
انا فى سجن
انا حالى اسوء من اللى فى السجن
انا حالى اسوء من حبيب العدلى

غزوة الصناديق

هو اولا انا اعرف ان كلمة غزوة دى تطلق على حرب للمسلمين
ويكون شارك فيها النبى صلى الله عليه وسلم
ثانيا اختيار الالفاظ مهم اوى فى الكلام
------------------------------------
طبعا انا مش عارف اقول ايه على الكلام اللى قاله الشيخ
وطبعا انا مش عارف اقف على انهى جبهة
واكيد مشكلة كبيرة لما تبقى عندك ضربات داخلية
مش عارف اتكلم
هى مشكلة الجماعة السلفية انها مش جماعة اصلا
ملهاش رئيس
ملهاش حاجة
ومع انى دى مشكلة بس بردو اقدر اقول ان ده سر نجاح الدعوة
طب ازاى مشكلة الجماعة ونجاح الدعوة
عادى
لانها مش جماعة
لانها دعوة
اذن احنا نمسك انها دعوة بقى
نركز بقى على الدعوة
طيب هى الدعوة دى حاجة بسيطة
حاجة قليلة لا دى مهنة الانبياء والرسول
ابعد على السياسة
ابعد وسبها لاهلها
ابعد عنا لاننا فى مقام دعوة وليس مقام اقامة دولة
لما نقيم فينا الاسلام سيقيم الله لنا الدولة
ولكن هذا ليس الوقت
لو سألت اغلب الناس دلوقتى هتقولك انا مش عايز حد يحكمنى بقال الله وقال الرسول
انا واحد صحبى قالى كدا
يبقى الحل ايه فى كدا
الحل اننا ندعو الناس
نعرف الناس علشان الناس هى اللى تطلب
مكملتش الموضوع علشان الشغل
كتبته يوم
24-3-2011
من اسبوع تقريبا
للحديث بقية ان شاء الله

بلدى بتعتى

طول عمرى عايش فى البلد دى وعارف انها بتعتى
وبحبها
مع انى بردو كنت عارف انها بتاعت ناس تانية
ووكلنها ولعه
بس الفرق بينى وبينهم
ان هما مبيحبوهاش
بيسرقوها بس
حتى لو ادعوا انهم بيحبوها وانهم امناء
مع الاسف اللى مزعلنى دلوقتى انى حاسس ان الناس دى لسه موجودة
بس مش فلول الحزب الوطنى والكلام الفاضى ده
لا ناس فعلا من اللى المفروض انهم بيحبوا البلد
انا مبنكرش انهم بيحبوا البلد
بس انا شايف انهم بيحبوا نفسهم اكتر
المهم دلوقتى عندهم مش ان البلد تقوم
لا المهم انهم يفضلوا كويسسين
المهم الاعلام يفضل فى ايديهم
زمان كان النظام عدو ليهم
زمان كان النظام عندهم بيظلم الشعب كله
دلوقتى هما شايفين المشكلة بقت فى الاسلاميين
والاسلاميين عندهم اى حد ينتمى الى الدين بصلة او بأخرى
ده بقى هو العدو
ده بقى المهم انه ميوصلش لاى حكم
مش عارف مين اللى قالهم ان حد الاسلاميين زى ما هما بيقولوا بيفكر يحكم
اللهم الا الاخوان
والاخوان علشان مش عايزين قلق قالوا بمنتهى الصراحة فى تصريحات كتير
احنا مش هنقدم مرشح للرئاسة ولا عايزين اكتر من 30 فى المية من المجلس
وبعدين سعات بيغضوا البصر عن الاخوان ويركزوا على الجماعات المتطرفة
وطبعا التطرف الرهيب بتاع السلفية واخبار هنا وهناك وبرنامج هنا وهناك
كلام فاضى وهبل وعبط
حسبنا الله ونعم الوكيل
طيب انا مش فاهم هو احنا اسوء من النظام القديم
هما سمعوا حد فينا بيقول امسك حكم
هما عرفين احنا مين بالظبط
طيب هو احنا جماعة
لينا مقر
لينا رئيس
مع الاسف اغلب اللى بيتكلم مش فاهم اى حاجة فى اى حاجة
هو خايف وخلاص
هو عايز يوصل للناس الخوف وخلاص
انا شايف ان ان شاء الله الحملة الاعلامية الكبيرة دى على السلفيين هتعمل نتيجة عكسية
والناس تدور وتعرف يعنى ايه سلفية
والناس تزيد فى حب السلفية
زى ما حصل مع النظام القديم لما عملت مسلسل الاخوان
الاخوان كانوا فقدوا كتير اوى من تأييد الناس فى الشارع
جه المسلسل خلى الناس ترجع تانى تحب الاخوان وتتعاطف معاهم
حتى لو بمجرد الوقوف بجوار الحق
انا شايف ان الناس دى متتعلمش
او بتتعلم بس اللى هى عايزة تتعلمه
مع انى عارف بردو انه طبيعى انه كلا يعغنى على ليلاه
مهو مش معقول حد بردو هيغنى على ليلة واحد تانى
بس الفكرة انه يبقى فيه شوية انصاف
مش معقول الظلم البين ده
حسبنا الله ونعم الوكيل
اللى هما مش قادرين يفهموا او فهمينه وخايفين منه
ان الشعب المصرى بتبعه بيحب الدين
وفى التاريخ اثبات لده كتير اوى
فى الحملة الفرنسية
فى دخول الاسكندر الاكبر مصر
وفى غيره وغيره
انا شايف ان الاعلام كدا بساعد الدعوة السلفية
ولا املك الا انى اقول للعلام
شكرا على الدعاية المجانية
ولا جزاكم الله خيرا
على عنوان كلمة للشيخ محمد اسماعيل المقدم قبل الاحداث بعنوان
ايتها الصحف السوداء والصفراء
شكرا للدعاية المجانية

يوم الاستفتاء

يوم جميل
روحت انا واتنين اصحابى
هما قالوا لا
وانا قولت نعم
وكنت حاسس بسعاده غريبة وانا رايح وانا فى اللجنة وبعد الاستفتاء
فرحان كدا مبسوط سعيد حاجات كتير كدا
الناس كمان تبوص فى عينهم تحس انهم مبسوطين
تحسن انهم فرحانين
وتحس كدا انك ماشى بتتنطط وانت رايح ووانت جاى من السعاده
انا شاركت مره وحده قبل كدا فى انتخابات 2005
وكان لسبب معين
بس طبعا مش مساعدة الاخوان علشان محدش يفهم كدا
هو كان خالى مترشح وروحت علشان انتخبه
مش عارف ليه مع انى كنت بقول لامى
دا خالى لو نجح يا ماما يبقى من علامات سوء الخاتمة له
بس الحمد لله منجحش
اهو لو ربنا يقدر الظروف وتتكرر وينجح يبقى ان شاء الله خير
لاننا ان شاء الله مش هنلاقى فى مجلس الشعب حراميه تانى
بعدها وقبلها عمرى مفكرت اروح
حتى لما كنت بفكر اروح كنت بقول على ايه يعنى كبر
دى البلد كلها فاسدة
دلوقتى البلد بجد اتغيرت الحمد لله
فعلا اتغيرت
حتى لو احنا محسناش برخاء اقتصادى دلوقتى وانا عارف انه لسه بدرى على الكلام ده
بس معنويا تحس بحاجات غريبة
معنويا تحس انك ماشى فى بلدك
تحس انك ماشى فى مكان بتحبه
تحس انك ماشى فى مكان بتاعك
غير الاول خالص
مع انى بردو زمان كنت بحب البلد دى
يعنى انا مش زى ناس كتير بتحب البلد بعد الثورة
لا انا فعلا بحبها من زمان
وانا حتى كنت بقول كدا
كنت بقول كدا وعارف ان دى من الفطرة
وكنت حتى لما اشوف الناس اللى بيظهر من كلامها انها مبتحبش البلد
كنت ببقى عارف انه كلام بس انما لو رجعته فيه هيتطلع بيحب البلد
هو بس مضايق من حاجة
انا حتى حاسس انى مبسوط انى كنت بحبها قبل ما الناس الكتير اللى بيحبوها دلوقتى يحبوها
انا كنت قبل ناس كتير
وبعدين ربنا بيقولنا ان اللى انفق قبل الفتح وقاتل مش زى اللى انفق بعد الفتح وقاتل
فعلشان كدا لازم ابقى مبسوط
بس برود علشان مننساش ان ربنا قال ان الاتنين كويسين
الاتنين انفقوا وقاتلوا
الحمد لله ان مصر رجعتلنا تانى
الحمد لله
هى كدا كدا بتعتنا
بس هى بس رجعت
الحمد لله
انا مجرد بس لما بتكلم على اليوم بتاع امبارح ده بتاع الاستفتاء بحس انى مبسوط
عارف لما تكون حاجه بتحبها وبتحب تتكلم عليها كتير هو بالظبط كدا
لما بحكى لحد لما بسئل حد عملت ايه روحت قولت ايه
الحمد لله
اه كمان اتصورت انا واصحابى جنب البوستر بتاع تعليمات الاستفتاء
وانا عامل علامة صح بصباعى اللى عليه الحبر الفسفورى
واصحابى علشان قالوا لا عملين علامة صح بردو بالحبر الفسفورى بس ايدهم لتحت
وواحنا هناك راجل عجوز وقف جنبنا يتفرج علينا واحنا بنتصور ومعاه واحد تانى
بيتفرجوا وبيضحكوا وبعدين سألنا قولتوا ايه
واحد صحبى كان بيقولى يا محمد
قاله قلنا لا
قالى محمد وقلت لا
قلته لا انا قولت نعم
هو ده اللى محمد وقال لا
وضحكنا وخلاص
طبعا هو قال كدا لاننا عرفنا ان الكنيسة قالت للمسحيين روحوا قولوا لا
وفعلا واكيد عملوا كدا
بس الغريب انى سمعت النهارده ان فى مسحيين كتير قالوا نعم
واكيد دايما هيبقى فيهم ناس بيفكروا
مش معنى كدا ان اللى قال لا مبيفكرش
انما قصدى ان مش بيسمع كلام الكنيسة على طول
وانا على فكرة كنت مقتنع بنعم قبل ما اسمع اى كلام من المشايخ
يعنى انا كنت مقتنع بنعم قبل كدا
كنت بقرء كلام اللى بيقول نعم واللى بيقول لا
وفى الاخر استقريت على نعم
فى الاخر كان يوم حلو الحمد لله
وربنا يصلح احوالنا واحوال البلد وبلاد المسلمين كلها ان شاء الله
شوف كمان لما تقرء ان فى لجان فى الجيزة وقفت شوية علشان الصناديق خلاص على الاخر
الحمد لله
المفروض نحمد ربنا ونصلى ونشكره على النعم العظيمة دى
الحمد لله
كنت لسه بقول لواحد قريبى انا بقول بردو هو احنا عملنا ايه علشان ربنا ينعم علينا بكل ده
قالى احنا غير كل الشعوب
احنا شعب طيب
الحمد لله
الجميل كمان ان انا رايح اقول نعم وحاسس ان فى نعم مصلحة البلد
واصحابى معايا الاتنين رايحين يقولوا لا وبردو من وجهة نظرهم ان دى مصلحة البلد
فالكل فى الاخر عايز مصلحة البلد

مدونة احمد عز

هو انا عايز اعمل مدونة احمد عز
عايز اعملها من فترة
بس من كتر ما الراجل ده مش كويس مش قادر احط نفسى مكانه
انا حتى لما اى حد يتكلم كلام ملوش لازمة فى العربية فى الموصلات مبتكلمش
عادى بعدى وعادى
الواحد اه بيضايق ان فى ناس دمغها لسه كدا بس تعمل ايه هى دى سنة الحياة
الا يمكن مره واحدة من يومين تقريبا
سواق العربية واللى قاعد جنبه كانوا بيتكلموا على الكمين وانه زى الته
بس كانوا مختلفين السواق بيقول انهم مبيخدوش عاطل فى باطل والراجل بيقول لا
وارح داخل اخينا ده فى الكلام وقالك واحد زى احمد عز
شركة اسمهما وقعت
وهو اشترى الاسهم بتعتها
وخدها وشغلها
شغل دماغه وجاب فلوس مسرقش يعنى
قال كدا وانا مقدرتش امسك نفسى
كنت نازل وقولتله وانا نازل
تصدق انت اول واحد اشوفه فى الشعب المصرى بيقول احمد عز مش حرامى
بسرعه الراجل اللى بينه وبين السواق قالى كنت لسه هقوله كدا
قولتله ايه يا عم لما نزلت من العربية وبقيت جنبه
انت حزب وطنى والا ايه
قالى لا يا عم ولا حزب وطنى ولا حاجة
فهل بعد الكلام ده اقدر احط نفسى مكانه مش عارف
انا لما كنت بتخيل انى بتكلم عن الضابط اللى قتل الواد بتاع اسكندرية
وعسكرى الامن المركزى
كنت بحط نفسى مكنهم بجد
انما ده احطى نفسى مكانه ازاى
دانا هعوز استحمى بميه نار لو عملت كدا
وهبقى كداب فى اى كلمة بقولها
عموما هحاول
بس فى حلقة تانية بقى علشان انسى انى بكدب

نعم

نعم للتعديلات الدستورية
ليه علشان بعد شوية هنغير الدستور كله
ليه لانى مش عايز رئيس الجمهورية تبقى مراته من دولة تانية
ليه علشان نبدء نبى بقى فى البلد مش لسه هتستنى فى فوضى 3 شهور او اكتر
لحد لما يعملوا دستور جديد
ليه علشان امريكا بتقول لا وعيزانا نفضل فى فوضى
ليه لان الحزب الوطنى قال اه وقالها نوع من انواع التضليل انا شايف كدا
ليه علشان نقفل كمان اى فرصة على الحزب الوطنى انه يجمع نفسه تانى
ليه علشان الناس اللى عايزة البلد تخرب تلاقى العكس هو اللى بيحصل
ليه علشان كدا كدا الريس الجديد هيعدل الدستور
ليه علشان دى خطوة مهمة اوى فى التغيير مكناش نحلم بيها
ليه لان كل لما الوقت يعدى البلد بتخرب
ليه لان مش مضمون لما استنى دستور جديد يطلع زى ما انا عايز
ليه لان لو مصر فضلت كدا 3 اشهر ممكن تعلن افلسها
ليه علشان الجيش يسلم السلطة بقى
ليه علشان الناس تبدء تحس معنويا ان فى حاجة بتتغير
ليه علشان خطوة البناء او عجلة البناء تبدء فى الدوران
ليه علشان لو معملناش كدا هيقولك سبونا بقى 3 اشهر على حد ادنى نعملكوا دستور جدا
ليه تانى لانه كدا كدا هيتعمل دستور جديد لما الريس الجديد يمسك
طب افرض مسك ومعملش دستور جديد
مش هيقدر لانه هيكون وعد عليه يعمل فى اول 6 شهور من مسك الحكم
مش هيقدر لانه مش هيقدر يعمل اى حركة من حركات النظام القديم
مش هيقدر لانه مش هيقدر يعمل اى حركة من حركات الدكتاتور
مش هيقدر لانه هيبقى عايز اسمه يتكتب فى التاريخ ان هو اللى نهض بمصر
مش هيقدر لاسباب كتير اوى
مش هيقدر لانه هيبقى عارف انه لو عمل حاجة غلط الشعب كله هينزله التحرير
مش هيقدر فعلا
وبعدين اللى بيقولوا ان الدستور اصلا فقد شرعيته مع الثورة
طب ما هما كانوا بيقولوا ان الثورة عايز تغير كذا وكذا فى الدستور
وبردو عايز افهم هو لو قلنا نعم دلوقتى علشان الدنيا تمشى
وبعدين كل الدستور هيتغير ايه العيب فى كدا
لا غير الدستور الاول
طب يا عم منا هغيره بس اوافق على التغييرات دى الاول كنقطة بداية
انا مقتنع بنعم
وحتى لو لا عندهم اراء مقنعة
بس نعم دلوقتى احسن علشان وضع البلد اللى بقى زى الزفت
انا مش عايز اعيش فى فوضى
انا مش عايز اعيش فى قصاص
انا مش عايز اعيش فى ماضى
انا عايز اشوف مصر جديدة
انا عايز اشوف مصر بتتغير للاحسن
انا عايز اشوف حاجة حقيقية على ارض الواقع
ارض الواقع فى التعديلات دلوقتى الريس مصرى متجوز مصرية بيس
ارض الواقع الريس له فترتين بس بيس جدا
ارض الواقع فترة الرئاسة 4 سنين يا جماله
نشتغل بقى
انا نفسى اشوف شفافية
انا نفسى كل حاجة يبقى ليها جدول زمنى
كل حاجة الشعب نفسه فيها
الحكومة تحطلها جدول زمنى والناس كلها تعرفه
يتعرض فى التليفزيون المصرى
يتكتب فى الجرائد
يتوزع فى ورق على الشعب
ريحونا بقى
دا هيريح الناس كلها
اللى بيبوس لقدام وعايز تنمية
واللى بيبوص لورا وعايز قصاص
كله هيرتاح
يا رب اصلح حال بلدنا مصر يا رب وكل بلاد المسلمين
يا رب

تخيل لو اسمك مبارك

كنت راكب عربية وبعدين اتلقيت راجل كدا بيقول لعيل صغير
ادخل انت يا مبارك جوا انت صغير
علشان يعنى المكان اللى فاضل فى العربية صغير وعلى اده
وبعدين قولت ياه كان ممكن الموقف ده يعدى عادى قبل 25 يناير
او يعنى قبل 11 فبراير
انما دلوقتى ممكن يعدى على حد اظن لا
اى حد كان هيأخد باله من اسم الواد ده
طب يا ترى الواد ده يتعامل مع اسمه ازاى
انا مش قادر اتخيل نفسى مكانه
بس لو انا مكانه
؟؟؟؟؟؟؟؟؟؟؟؟؟؟؟؟؟؟؟؟؟
فى المدرسة هيبقى موقفى محرج جدا
المدرس قوم يا مبارك
كل العيال هيضحكوا
فى الشغل اول ما يروح كل الناس لما تشوفه هتضحك
وهو رايح ووهو جاى الناس هتبقى عينها معاه
اسمه هيبقى كأنه وصمة عار مبارك
طب ابوه ليه سماه مبارك
مش عارف اختار الاسم ده ليه
اصحابه هيبعتوله رسائل تريقة على الموبيل
مش هيعرف يهرب من التريقة خالص
مش هيعرف يهرب من عيون الناس اللى عارفه اسمه
شوف مع انه مش اسمه هو شخصيا
اسم جده بس شوف عمل ايه فى جده
الحمد لله ان اسمى مش مبارك

مدونة عسكرى امن مركزى

انا من بلد صغيرة تبعة لمحافظة الدقهلية
سنى 19 سنه
اتأخرت عن الجيش شوية
بس نصحونى قريبى من البلد ومن البندر انى اروح
اروح علشان ميحصلش مشاكل لو نزلت مصر
ويا ريتنى ما روحت ولا سمعت كلامهم
روحت الجيش
ومنه على الامن المركزى فى الداخلية
مكنتش اعرف ان الجيش بيروح منه على الشرطة
كنت فاكر ان الجيش ده كله على الحدود وضد اسرئيل
من ساعة ما دخلت الامن المركزى ده وانا حياتى اتغيرت
حاجات كتير بتحصل وانا مش فاهمها
كنت مبسوط فى الاول وفاكر انها ترئية
مع انها ترئية غريبة
وكنت مبسوط لانى حسيت ان المخبرين اللى فى بلدنا مش هخاف منهم تانى
انا شغال فى الداخلية بقى
بخد مرتب
بعد كدا اكتشفت انها ممكن عقوبة مش ترئية
لانى شوفت ذل غريب هناك ومعملة غريبة
كنت بستغرب من الناس اللى فى بلدنا اللى بتشتكى من الجيش
ولما دخلت الدخلية عرفت
طلعت مش يرئية طلعت ذل
هما قالولنا اننا بنخدم الوطن
وانا كنت عارف ده عن الجيش
انما عن الشرطة لا دى بتخدم الشعب مش الوطن
رغم انى سألت واتجوبت بألم على وشى
راحت معاه كرمتى
او اللى باقى من كرمتى
كان واحد من بلد جنبى بيقولى لما يشوفنى زعلان
دول بيخلونا رجالة متزعلش
بس انا كنت بزعل مال الرجولة بقلة الادب
اللى كان بيصبرنى انى كنت بحس انى بخدم الناس
او بخدم البلد
والناس كويسه والبلد بحبها
لحد لما حصل حاجتين اغرب من بعض
مفهمتهمش الا بعدين
اول حاجة كانت حريقه واحنا نايمين
وناس اعرفهم كتير ماتوا الله يرحمهم
قالولنا اصحابكوا دول رجالة
ماتوا شهداء
لانهم بيدفعوا عن الوطن
وهنا لتانى مره اسأل وطن ليه مع انى خدت المره اللى فاتت ألم
بس مقدرتش امسك نفسى المره دى
دول كانوا نايمين
عرفت الاجابة وبينت الاجابة القديمة
اه دول كانوا نايمين علشان يقوموا يدافعوا عن البلد
واللى فات عرفته كمان
لان الدفاع عن الناس ده دفاع عن البلد
فرحت اوى بالاجابتين
لدرجة انى نسيت ان المطافى منعوها من الدخول
وفضلت يجيى شهرين ناسى الموضوع ده خالص
وفرحان علشان انا فى الجيش
اه روحت الداخلية
بس بعمل زى الجيش
وبدافع عن البلد بجد
لحد لما عدى الشهرين وافتكرت الموضوع تانى افتكرته لما كنت واقف خدمة بالليل
وحصلت حريقة فى بيت جنب الخدمة
وانا مع الناس بتابع بس مش قادر اسيب الخدمة
لحد لما صحيت على تعاسه الذكرى
صحيت على عربية المطافى جايه بسرعه
فى اللحظة دى حياتى وقفت
وبدأت وكأنى عايش من شهرين
واحصابى جوا بيولعوا
واحنا بنرمى ميه من اى حته
ومفيش مطافى
افتكرت
زعلت
بكيت
ورجعت افتكرت انى مش فاهم
مش فاهم ليه ملحقوش اصحابى
مش فاهم ليه سابوهم لحد لما اتحرقوا
مش فاهم
ولحد دلوقتى وانا مش فاهم
الحاجة التانية اللى حصلت كانت انى عرفت ان كمان كام يوم عيد الشرطة
فرحت مكنتش اعرف
وقولت هناخد اجازة اروح البلد
بس محصلش
وحصل العكس تماما بدل ما كنا بنشتغل 12 ساعة
بقينا بنشتغل طول اليوم ونام شوية فى الشارع
ساعة اتنين
ونصحى نشتغل تانى
لا والاغرب من كدا ان الناس اللى احنا بنحميها
هى اللى احنا وقفين وبنحمى البلد منها
او بمعنى تانى
شوية من الناس
فجأة اكتشفت ان الناس مش كلها بتحب البلد زيى
فجأة عرفت ان فى ناس كتير اوى مبتحبش البلد كتير كتير
ولا بتحب المسلمين وهما كمان مش مسحيين لانهم بردو مبيحبوش المسحيين
وهما بردو مش يهود لان كان فيهم ناس عارفهم ناس بشوفها فى الشارع عادى مشيين
كانوا بيقولولى وانا واقف خدمة سلام عليكم
زمان
دلوقتى بيضربونى بالطوب
علشان بدافع عن البلد
دى كانت بالنسبة لى اغرب من الحريق اللى مات فى اصحابى
انا بقولك سلام عليكم النهارده وبضربك الاسبوع اللى جاى بالطوب
دا اللى حصل فى عيد الشرطة
بعد كدا فهمت وعرفت الاجابات اللى كانت محيرانى بعد بعدها بكتير
بعد 3 اسابيع عرفت الاجابة
عرفت ان اللى كانوا بيضربونا بالطوب دول بيحبوا البلد
عرفت ان احنا مش بنحمى البلد
عرفت ان الناس اللى كنا وقفين ليهم دول محترمين وهما اللى بيقولولى سلام عليكم
هما فعلا
وعرفت كمان ان بلدنا فقير علشان العضو بتاع المجلس بتعنا غنى
وعرفت كمان ان اهل مصر دول كمان زينا شكلهم حلو بس معهمش فلوس
ويمكن احنا احسن منهم بناكل احسن منهم
وعرفت انهم طلعيين علشان كل اعضاء المجلس عندهم اغنية بردو
وعرفت ان الحكومة غنية وظالمة من اصغر راس لاكبر راس
مكنتش متخيل ان مصر فقيره
كنت بحسب بلدنا بس
والبلاد اللى زيينا
انما مصر
البندر
غريبة
اتارى كل الناس اللى فى الداخلية حارمية
اتريهم كانوا بيضحكوا علينا بانهم بيحبوا البلد
بيحبوا البلد وبيحبوا فلوسها
اتريهم سابوا اصحبنا يتحرقوا علشان السرقة اللى بيسرقوها
منهم لله
مش هنسى لما كنت مستنى العيد علشان الاجازة وطلع مش عيد ولا اجازة
مش هنسى لما نمنا على الرصيف واحنا قعدين بعد ما وقفنا 18 ساعة
مش هنسى لما صحونا بعد شوية صغيرين علشان نقف تانى
مش هنسى لما قالولنا ان احنا واقفين علشان نحمى البلد
مش هنسى لما قالولنا ان احنا بنحمى البلد من الناس اللى مبتحبش اى حد غير اليهود
مش هنسى لما قالولنا دول عملين نفسهم بيصلوا علشان يضحكوا علينا
مش هنسى لما قالولنا دول ناس من اسرئيل ضحكوا عليهم وبيخلوهم يعملوا كدا
مش هنسى لما ضربونا مع الناس اللى جاية تخرب البلد بالغاز وناس مننا ماتوا
احنا معاكوا احنا مبنخربش البلد
الحرق
والمظاهرات قصدى الثورة فهمونى حاجات كتير
عسكرى امن مركزى

وتم قمع الثورة

هو فى حاجتين
اول حاجة انه تم قمع الثورة
وفى حاجة تانية مختلفة شوية بس مش اوى ان الثورة المضادة نجحت
الاتنين دول ممكن يعملوا نتائج كتير اوى والنتائج هتبقى متشابهة
هو قمع الثورة محصلش وخلاص عدى وقته مش هيحصل
اما الثورة المضادة فوارد انها تنجح بس بنسبة ضعيفة
بس على افتراض نجاح واحدة منهما كان ايه اللى هيحصل
---------------------------------------------------------
1- احمد عز
تم تبرئته من كل التهم الموجهه ايه كما تبين للجنة تقصى الحقائق انه كان بيحط من جيبه فى جيب الوطن
وده طبعا هيحصل لكل اللى زيه مغربى وجرانه وكل الشلة الجميلة دى
2- الاخوان المسلمين
مش عارف اقول هيتعمل فيهم ايه بس عموما هتبهدلوا جامد اوى واحتمال تسمى الجماعة المقضى عليها بدل المحظورة
3- برامج التوك شو
مجدى الدقاق هيجى فى برنامج العاشرة مساء ويتكلم عن التهم الخاطئة اللى تم توجها لرجال الحزب
ممتاز القط هيجى فى برنامج 90 دقيقة ويتكلم عن مدى الشفافية اللى بيتمتع بها رجال النظام
مرتضى منصور هيجى مع عمرو اديب ويتكلم على اد ايه الريس بيقف مع الحق
احمد المسلمانى هيتكلم عن عناوين الجرايد بتاعت التلت سنين اللى جايه وممكن يجيب هيكل يتكلم شوية عن عبد الناصر
4- الجيش المصرى
هيطلع طبعا فى التليفزيون البطل اللى حافظ على امن البلاد وامن المواطنين طول فترة الثورة
5- الرئيس مبارك
هيتكلم طبعا عن المعارضين وقد ايه هو كان صدره واسع ليهم
7- عبد الرحمن يوسف
هيتنفخ
8- البردعى
مش هيجى مصر تانى
9- نواره نجم
هتكتب الواجب مع ولادها
10- ابراهيم عيسى وحمدى قنديل
هيسيبوهم علشان يبقى بردو فى صوت للمعارضة
11- السلفيين
هيطلع اختيارهم الاول فى عدم المشاركة كان صح وهيتعقبوا على تغيير الفتوى وهيطلع عنيهم
12- صفحات الثوار على الفيس بوك
هيبقى عندها حالة يئس رهيبة
13- تعليقات الناس على الموضيع على النت
هتقل جدا واكتر الاخبار هتبقى شبه بعضها والمعارضة مش هيبقى ليها صدى
14- المترو
هيبقى رايق اوى علشان هيبقى مرشق امن دولة وملتحى وحليق هيطلع عين ابوهم
15- المرور والطرق
هتبقى زحمة اوى علشان مفيش كمين هيعدى عربية الا لما يفتشها كويس اوى او بمعنى تانى يرخم عليها اوى وكل سواق مكروباص هيأخد هدية من الحكومة 30 ضربة على قفاه كل يوم
16- الشعب المصرى عموما
هيصاب بحالة رهيبة من الاحباط والناس هتبقى ماشية حاطه راسه فى الارض
17- اسر شهداء الثورة نحسبهم عند الله كذلك
هيطلع واحد غريب عجيب من كل اسرة ويقول ازاى قريبه ده كان مختل عقليا او انه كان انطوائى او انه كان عنده عقد نفسيه المهم يطلع فى الاخر مش طبيعى
18 - فواتير الكهرباء والمياه والتليفون رغم انه متخصص
كل الفواتير دى هتزيد اوى لدرجة ان الكحومة هيبقى ليها فلوس كتير اوى عند الشعب وهتقسط الفواتير نظرا لرحمة الحكومة بالمواطنيين
19- اسعار السلع الاساسية
طبعا هتزيد والحكومة هتطلع تقولك انت عايزين ثورة من غير خسائر
20 - اسعار البنزين وبالتالى المواصلات
اكيد بردو هتزيد بس  الحكومة هنا هتعمل حاجة جميلة اوى هتنزل اتوبيسات جديدة زى الحمرا بتاعت نظيف وجمال ولون الاتوبيس هيبقى اسود وهينور اخضر والتذكرة بتعته هتبقى رخيصة اوى ب 5 جنيه والناس هتستناه بالساعتين فى المحطة وفى الاخر يجى مليان من الناس الاذكية اللى استنيته قبل المحطة الرئيسية بمحطتين تلاته وهو لسه فى الاتجاه العكسى لطريقهم المراد
21 - رغيف العيش
طبعا هيبقى موجود بس عليه طوابير من مصر لاسكندرية والحكومة هتنزل الجيش يوزع العيش ويساعد فى القضاء على ازمة العيش واسعار العيش الابيض هتبقى فلكية
22- كنتاكى
هيلغى توكيله فى مصر وهيفتح مكانه محلات عزاوى وهتبقى واجبتها حلوة واسعارها معقولة ودى هتبقى هدية من عزاوى لشعب جعان
23- المدعى العام
هيرجع تانى لقضية هشام طلعت مصطفى وهشام هيأخد براءة والسكرى 3 سنين سجن
24- الواد محمود المتهم فى قضية قتل بنت ليلى عفران هيتعدم
25 - احمد نظيف وبطرس غالى والحكومة القديمة هيتم تكرمها على اساس انها اللى حطت حجر الاساس للحكومة الجديدة اللى عدت بمصر من الازمة
26 - المطربين
هيعملوا اغنية جديدة للريس اسمها اول ثورة مصرية
27 - الممثلين
اللى كان معارض منهم هتزيد نجوميته واللى كان معارض منهم هيعتذر ويقول انه مكنش فاهم زى تامر وهما اللى قالولو
28 - تامر امين وخيرى رمضان هيخدوا جائزة اوسكار احسن مذيعيين
29- حسام وابراهيم حسن هيمسكوا ادارة نادى الزمالك مدى الحياة وممكن يورثوه لاولادهم ويغيروا اسمه
30 - انا
كان ممكن اتجنن وممكن بيس عادى انا كنت متوقع كدا وهشيد بدور الحكومة واد ايه كانت زكية فى الثورة المضادة او قمع الثورة

مدونة ضابط عادى

انا الضابط اللى موت الواد بتاع اسكندرية
اللى البت منها لله صورتنى بالموبيل
دى احداث الواقعة علشان تعرفوا انى برىء
-----------------------
انا كنت واقف يوم جمعة الغضب
مكنتش متوقع اى حاجة تحصل
وده كان يوم 28 يناير
كنت متوقع ان اللى بيقولوا عليها جمعة الغضب دى هتيجى على فشوش
لان كان عندنا بيانات من القيادات العليا بتفيد بكدا
وان يوم 25 يناير عدى صعب شوية بس عادى مفيش مشاكل
اه
انما المره دى الناس اللى نزلت هتخاف تنزل تانى
وطبيعى الناس اللى منزلتش هتكسل تنزل زى ما كسلت قبل كدا
والخلاصة ان كل شىء تحت السيطرة
---------------
تقريبا كل التوقعات دى طلعت غلط
واللى حصل كان مفاجأة لينا كلنا وللقيادات كمان كلها
وحتى للناس كلها
وبدئنا نحس اننا قدام طوفان
مش طوفان من الناس
لا طوفان بمعنى طوفان
مش معقول حاجة زى ما تحس
ان انت اه معاك سلاح
حد فعلا اداك سلاح
بس دخلك فى حلبة ودخل عليك ناس كتير اوى
لدرجة ان الحلبة مش مستحملة العدد ده كله
وده فعلا اللى حاصل
لان اعداد الناس كانت اصعب من ان تحصى
وفلول الناس كان لا يرى اخره بالعين المجرده
كانت من اغرب المشاهد اللى شافتها عينى
احنا سعتها اتصدمنا بس معملناش حاجة
وكنا رجالة
وفضلنا واقفين
الناس عايزة تيجى علينا تنهش لحمنا
شايفيين ده فى عنيهم كويس اوى
بس خايفين
خايفين من اننا معانا سلاح
وميعرفوش اننا مرعوبين منهم
وميعرفوش ان السلاح ده لا حول له ولا قوة
وميعرفوش اننا ممنوع نستعمله
وحتى لو بعض القيادات قالت اه استعملوه
فالكلام ده موصلش لينا
وحتى لو وصل هنفكر الف مره قبل ما نعمل كدا
لاننا مش مجانيين
ولاننا منقدرش نضرب اى حد كدا وخلاص
وحتى لو فى اخطاء وكتير للجهاز بتاعنا
انما مش معنى كدا اننا بنقتل ابرياء على الفاضى وعلى المليان
المهم ان ده باختصار كان المشهد
مع ان ده شرح بسيط جدا ليه
لان لو المشهد اتحكى صح هيبقى صعب جدا انه يتكتب هنا
هيحتاج فعلا كتب تتكلم فيه
النقطة المهمة اللى كتبت علشانها الموضوع
لو قلت الواد
انا مهما وصفت الرعب فى اللحظة دى محدش هيصدقها
انا مضربتوش بالنار زى لما بتموت جندى اسرئيلى فى حرب
مع انى محربتش
بس ده مكنش احساسى خالص
انا الضربة كانت ضربة خوف
الدوسه على الزيناد كانت دوسه خوف
خوف شديد اتمكن منى
انى هموت هموت دلوقتى
وياريتنى حتى هموت من ضربة نار
لا انا هضرب ضرب فظيع لحد لما اموت
ومش عارف ايه ممكن يتعمل فى
خصوصا انى كنت شايف البلطجية اللى كنا بنضربهم فى القسم وبنوقفهم فى الشوراع
كنت شايفهم وسط الناس كويس
وكنت حاسس كأنهم جمعوا الناس دى كلها وجم ينتقموا مننا
وكنت حاسس بدور قيادى ليهم
مع ان حقيقى ان اغلب الناس كانت متحضرة انما كانت بغير وعى بتعمل زى البلطجية
انا عارف الاحساس ده كويس
جربته قبل كدا فى مظاهرات ايام المدارس طبعا قبل الكلية
جربته كنا بنعمل حاجات غلط مكناش بنبقى ناويين نعملها بس بتتعمل غصب عننا
فى المظاهرات من فرط الحماس
وكان ده فعلا اللى حاصل كل لما واحد بلطجى يعمل حاجة الناس تقلده وخلاص
وكان الداعى لده ايه انا مش فاهم
داحنا كنا مسلمين خالص
لحد لما شوفت بعد ايام الفيديوهات وعرفت ان فى ناس من الجهاز بتعنا
اتعملت مع المتظاهرين بوحشية عارمة
اللحظة الحرجة
فى ظل الاحاسيس الرهيبة بالخوف دى
بدأت الناس تتقدم علينا بشكل مرعب
وبسرعة مرعبة
وبدء قلبى يدق دقات غريبة لدرجة انى كنت حاسس انه هيخرج من جسمى
وحاسس ان فى دقات من دى وانا بكتب دلوقتى
بس طبعا مفيش مقارنة
عملين نكلم القيادات العليا بالاسلكى مفيس اى رد
مش سمعين منهم اى حاجة
احيانا مفيش اى اتصال
واحيانا نسمع طلقات نار لما الخط يرجع
والعساكر اللى كانت معايا كنت شايف الخوف فى عنيهم
كنت شايف فى عنيهم خوف ميقلش عن اللى انا حاسس بيه
وبيسألوا نعمل ايه يا باشا نتصرف ازاى
وانا مش عارف ارد
لسه مجلناش اوامر باى حاجة
اثبت مكانك
انت بتحمى الوطن
اجمد يا عسكرى انت وهو
اجمدوا
وانا مش قادر اجمد
وانا مرعوب اكتر منهم
لحد لما ناس قربت مننا اوى
بدءوا يضربوانا بالطوب
ناس اتجرحت عساكر كتير
فى ناس كان جرحها بينزف وهى واقفه
واللى كانت بتيجى طوبة على دماغة كان بيقع وميقمش تانى من الخوف
علشان حد يدخله جوا يوديه القسم ينقله مستشفى اى حاجة المهم يهرب
لدرجة انى تخليت ان دول كمان هيجروا ويسبوانى
وانا الناس هتقطعنى
جه فى دماغى ولادى
ابنى
بنتى
جه فى دماغى مراتى امى ابويا
هتجنن لا
فى اللحظة دى ضربت نار فى الهواء بدأت الناس ترجع
قولت كويس خت شوية قوة وشجاعة
صوتى طلع بقوة اثبت
هيمشوا
كانت الغلطة انى ضربت نار اكتر من مره
اتعكست الاية تانى
الناس بتتقدم اسرع واسرع
لا دا موت
ضربت نار كتير اوى فى الهواء
خت من كذا عسكرى رشاشات وضربت خافت الناس من صوت الرشاش وجريت كويس تمام
خلص المسلسل على كدا وناس كتير اوى دخلت فى شوارع جانبيه
وناس كتير جريت
لحد ما بدء ناس تخرج تانى من الشوارع اتارى المسلسل لسه
كل شوية افتركه خلص واخد شوية شجاعه
وارجع تانى القيه بيبدء من الاول واعنف من اللى قبله
انا مش فاهم فيه ايه
انا مش فاهم هل انا روحت بلد تانية والا ايه
طيب هوا انا لابس لبس اسرئيلى لا
مش فاهم خالص ليه كدا
فى اللحظة دى بالظبط
ضربت الواد بالنار
كان من الناس اللى عماله تخرج
كان خارج جاى
وطبعا الناس هترجع وراه وهتتشجع
ماهى عرفت اننا بنضرب فى الهواء وخلاص
مش هينفع اجرى
مش عايز اموته
ضربته ومات
وهوا ده اللى حصل
وبس
ليه سمحتوا ال بتشينوا فى فيلم مش عارف اسمه ايه
لما موت وهو مش قصده
لما اتعرض لضغوط شديدة ومقدرش يستحملها
لما راح جزيرة والا بلد مفهاش ليل ومنمش وقت طويل جدا
علشان يحقق فى الجريمة
وموت وهوا فاكر انه بيموت القاتل الحقيقى
وموت صحبه من الضغط واللخبطة
مصر فى الوقت ده كانت بردو جزيرة مفيهاش ليل
كله نهار وكله مظاهرات يوم الجمعة كان اطول يوم فى حياتى
كنت مضغوط
كنت خايف
كنت مش فاهم
ليه دايما الناس اللى بتقتل قتل خطأ بتتسامح وانا لا
الدين فيه دية لقتل الخطأ
انا عايز ادفعها من دم قلبى
انا طبعا مش مسامح نفسى
ومش عايز الناس تسامحنى
بس عايز الناس تفهمنى
ومش عايز اشتغل الشغلانة دى تانى
انا كنت فاكر انى زى ما علمونا فى الكلية بحمى الوطن
انا مكنتش فاهم حاجة
بس انا وانا بكتب كدا بردو علشان ابقى صريح
مش عارف هشتغل ايه
ومش زى الناس الاغنية اللى ميفرقش معاها
وانا مش حاجة اصلا فى الجهاز بتعنا
وخلاص مش عايز ابقى حاجة
انا عايز اموت مسلم
وعارف ان محدش هيسمحنى
ولا طبعا اهل الواد
وعموما انا اصلا مش مسامح نفسى
وبردو مش اسف
ولو حد يقدر يحط نفسه مكانى يحط ويقولى كان هيعمل ايه
وسبوكوا من فكرة الانظمام للمتظاهرين دى
بتاعت الجيش
دى لان الجيش اصلا بيحبهم
ودى بتأخد وقت فى التفكير
وانا اقدر اجزم ان الضابط بتاع الامن المركزى بتاع التحرير
اللى انضم للمتظاهرين انضم وهو مرتب من زمان
مش معقول يفكر ويعملها فى سعتها
هو كان متابع اكيد النت
هو اكيد كان عارف الشارع فيه ايه
انا مكنتش عايش فى مصر
انا كنت عايش فى بينا وفى وزارة الداخلية

سفالة العمل

عايز اتكلم عن السفالة فى العمل بس ده موضوع كبير اوى وهيأخد وقت كتير
علشان كدا انا هعمله على حلقات
الحلقة الاولى يا ترى عندك مدير ست والا راجل
الحلقة الثانية يا ترى الناس اللى بتساعدها فى الشغل بترد ليك الجميل والا بطنش
الحقلة الثالثة يا ترى كام واحد فى الشغل عمل فيك اسفين
الحلقة الرابعة الخديعة الكبرى حد كنت فكرة كويس
الحلقة الخامسة ازاى تنتقم ... اكيد تنفض
الحلقة السادسة
فى حلقات كتير اوى بس الواحد مخنوق دلوقتى ومش قادر يركز
وطبعا انا مش هكتب حاجة جوا الحلقة انا هسيب المشاهد هو اللى يكتب اللى هو عايزه لان مصر بعد 25 يناير مش زى مصر قبل 25 يناير